Экс-президент Нұрсұлтан Назарбаев Өзбекстан басшысы Шавкат Мирзияевпен телефон арқылы сөйлесіп екеуі бір-бірін жаңа жылмен құттықтады. Бұл туралы Қазақстанда ресми хабарланбағанымен, Өзбекстан президентінің ресми сайты мәлімет таратқан.
Ресми мәліметте экс-президент пен президенттің «бір-бірін келе жатқан жаңа жылмен құттықтап, бауырлас елдердің халқына бейбітшілік, тұрақтылық және өркендеу тілеген» делінеді.
Өзбекстан президенті сайтының хабарлауынша, 29 желтоқсанда болған әңгіме барысында екі ел арасындағы достық пен стратегиялық серіктестік «жоғары деңгейге жеткені», ал көпжақты әріптестік «басым бағыттар бойынша сатылап дамып жатқаны» сөз болған.
Кремль 27 желтоқсанда Нұрсұлтан Назарбаевтың Ресейге барып, президент Владимир Путинмен кездескенін хабарлаған. Ал Назарбаевтың кездесулері мен телефон әңгімелері туралы экс-президенттің баспасөз қызметі ешқандай ақпарат таратқан жоқ.
Қазақстанды 30 жылға жуық басқарған Нұрсұлтан Назарбаев 2019 жылы наурызда қызметін Қасым-Жомарт Тоқаевқа тапсырып, отставкаға кеткен. Алайда ол Қанды Қаңтарға дейін өз ықпалын сақтап қалды. Кемінде 238 адамның өмірін қиған Қанды Қаңтар оқиғасынан кейін Назарбаев өзіне берілген көптеген артықшылықтардан айырылып, айналасындағы адамдардың кейбірі қызметінен кетіп, кейбірі сотталды.
