Қырғызстан Конституциялық соты президент Садыр Жапаровтың өлім жазасын қалпына келтіру ұсынысын Конституцияға қайшы деп тапты. Конституциялық сот бұл ұсынысты қарастырған соң «қабылданбайтын және заңды түрде мүмкін емес әрекет» ретінде бағалап отыр.
Қырғызстанның Конституциялық соты балаларды зорлау және зорлаумен байланысты кісі өлтіру үшін өлім жазасын енгізу туралы заң жобасына қатысты осындай қорытынды шығарды.
Қорытынды құжатта өлім жазасына тыйым салу және өмір сүру құқығының басымдығын мойындау тек нормативтік қана емес, сонымен қатар негізгі құндылық өлшеміне ие екені айтылған.
Конституциялық сот өлім жазасын қалпына келтіруді «адам құқықтары мен бостандықтарының кепілдігін күшейтетін таңдалған конституциялық вектордан ауытқу» деп танып отыр. Конституциялық Сот сонымен қатар осы мәселенің халықаралық-құқықтық жағын да атап өткен.
«Конституциялық сот өлім жазасын Конституцияны өзгерту арқылы қалпына келтіру Конституцияға қайшы, қабылданбайтын және заңды түрде мүмкін емес деген қорытындыға келді. Тиісінше, «Қырғызстан Республикасының Конституциясына өзгертулер енгізу туралы» Қырғызстан Республикасы Заңының жобасын референдумға шығаруға болмайды және оны қабылдау бастамасын жүзеге асырудың барлық рәсімдері Қырғызстан Республикасы Конституциялық сотының шешімі күшіне енгеннен кейін тоқтатылады», — делінген құжатта.
Белгілі болғанындай, 1 қазанда президент Садыр Жапаров Қырғызстан 2007 жылы алып тастаған өлім жазасын қалпына келтіру үшін заңнамалық түзетулер енгізуді тапсырған еді. Бұл 17 жастағы қыздың өлімі оқиғасынан кейін өріс алған әрекет болатын. Өлім жазасын қалпына келтіру туралы заң жобасы парламент мақұлдағаннан кейін референдумға шығарылады деп күтілген.
