Астанада бұрын түрлі лауазымды қызметті атқарған Ержан Бабақұмаров қаза болғаны хабарланды. Ресми мәліметке қарағанда Бабақұмаровты төбелес кезінде соққыға жыққан.
Астана полициясы Бабақұмаровтың төбелес кезінде қаза болғанын растап отыр.
“Жанжал төбелеске ұласқан. Соның салдарынан 56 жастағы ер адам жарақат алып, қаза болды. Адам өлтіру фактісіне қатысты қылмыстық іс қозғалды,”- деп хабарлады Астана полициясы.
Күдіктінің ұсталып, уақытша қамау орнына жеткізілгені айтылады.
Ержан Бабақұмаров еңбек жолын 90-жылдары Алматы әкімдігі аппаратынан бастаған. Кейін президент әкімшілігіне ауысып, ақпараттық орталыққа жетекшілік еткен.
2006-2007 жылдары мәдениет, ақпарат және спорт вице-министрі болды.
Тоқаев президенттікке келгеннен кейін шамамен үш ай президенттің кеңесшісі болды. Кейін Алматы қаласы әкімінің орынбасары болып тағайындалып, Қаңтарға дейін сол қызметте болды.
Қанды Қаңтардан кейін Бабақұмаров жұрт алдына шықпай кеткен.
