Оппозиция жариялаған митинг қарсаңында және митинг өтеді деген күні – 25 қазанда Қазақстанның түрлі өңірінде ұсталғандар 30-ға жуықтады. Олардың кейбірі қамалды, кейбіріне айыппұл салынды. Бұл туралы Азаттық радиосы хабарлады.
Ұсталғандардың тізімін құқық қорғаушы Бақытжан Төреғожина жариялады.
Қазақстанда мемлекеттік мереке ретінде жарияланған Республика күні, 25 қазанда кейбір белсенділер үйлерінің маңын полицияның торуылдап жүргенін, сыртқа шыға алмай отырғанын хабарлаған. Мысалы, белсенді Күміс Құлманова үйінің сыртына шығып, өзін жәй көлікте отырған екі адамның сыртқа жібермей отырғанын айтып, көлікте отырғандармен сөйлеспекші болады. Бірақ көліктегілер шықпай қояды.
«Қымбатшылық болмасын, қосымша құн салығы қымбаттамасын дегеннің несі айып? Неге соны маған айтуға мүмкіндік бермейсіңдер? Өздеріңнің жалақыларың жете ме өздеріңе?»- деп сұрайды. Бірақ көліктегілерден жауап болмайды.
Бұған дейін шетелде жүрген экс-банкир Мұхтар Әблязов жақтастарын митингіге шығуға шақырған.
Ішкі істер министрлігі ұстауларға түсініктеме бермеді.
Әблязов құрған «Қазақстанның демократиялық таңдауы» қозғалысын Қазақстан соты «экстремистік ұйым» деп танып, ел аумағында қызметіне тыйым салған. Ізінше «Көше партиясы» ұйымы да елде тыйым салынған ұйымдар қатарына енген. Дегенмен Еуропарламент аталған екі қозғалысты «бейбіт оппозициялық ұйым» деп атаған.
