2022 жылғы Қаңтар оқиғасынан кейін қорғаныс министрі болып тағайындалған Руслан Жақсылықов лауазымынан босатылды. Бұл туралы Ақорданың баспасөз қызметі хабарлады.
Бұл қызметке Дәурен Қосанов тағайындалды. Ол бұрын қорғаныс министрінің орынбасары – Қазақстан қарулы күштері әуе қорғанысы күштерінің бас қолбасшысы қызметін атқарған. 55 жастағы генерал-лейтенант авиация Дәурен Қосанов Армавир жоғары әскери ұшқыштар авиациялық училищесін, Ю. Гагарин атындағы әуе күштері академиясын, сондай-ақ Ресей қарулы күштері бас штабының әскери академиясын тәмамдаған.
Бұған дейін министр болған Руслан Жақсылықов — әскердегі адам өліміне байланысты қоғам сынына жиі ұшыраған және осы проблемаға нақты жауап бере алмаған шенеунік. Оның орынсыз сөздері мен мемлекетттік тілді меңгермегені де қоғам наразылығын тудырған. Соңғы кездері адамдарды әскерге күштеп әкету оқиғаларында да қорғаныс министрлігі қоғам қанағаттанатындай түсінік бере алмаған.
Тағы бір оғаш оқиға — Руслан Жақсылықов осыдан тура бір ай бұрын, 8 мамырда Жеңістің 80 жылдығында Мәскеуге жасаған сапары барысында ресейлік әріптесімен кездесуде дипломатиялық ағатттық жіберген. Сонда ол «Біз — қонақ емеспіз. Біз – достармыз, одақтаспыз және қарулас бауырлармыз»- деп, 7 мамырда Қазақстанда өткен парадтың «Отан қорғаушылар күніне орай емес, Жеңіс күніне арнайы өткізілгенін» айтқан.
Ілгеріде осы салада қызмет атқаратын жұбайы және 3 баласымен әскери киім киіп түскен Жақсылықовтардың суреттері де талқы тудырған. Сондайда министр әйелінің әніне клип түсіруде әскери бөлімдерді тегін пайдаланатыны айтылған. Бірақ Жақсылықов қоғам сынын тудырған мәселелердің ешқайсысына жауап берген емес. Журналистер сұрағына жауап бергенде де орынсыз қылжағымен көзге түскен шенеунік болды.
