Иранда президент сайлауының екінші кезеңінде реформатор Масуд Пезешкиан жеңіске жетті деп хабарлады IRNA агенттігі.
Пезешкиан 16,4 млн-ға жуық дауыс жинады, ал оның қарсыласы Саид Джалили 13,5 млн дауысқа ие болды. Бір апта бұрын өткен президент сайлауының бірінші кезеңінде Пезешкиан 10,4 миллион дауыс алған.
Елде әйелдер мен радикал оппозиционерлерге сайлауға түсуге тыйым салынған.
Иранның тарихында президент сайлауының екінші кезеңі тек 2005 жылы болған. Мұнда 61 млн-нан астам адамның дауыс беруге құқығы бар. 5 шілдеде сайлау учаскесіне тек жартысы келген.
Mehr агенттігінің жазуынша, дауыс беру Конституцияда қарастырылған мерзімнен (10 сағат) алты сағат ұзағырақ болған. Бірақ мұның бәрі Саид Джалилидің емес, Масуд Пезешкианның пайдасына шешілген.
Оппозиция сайлауды «цирк» деп атап бойкотқа шақырған
Бұл кезектен тыс сайлау 2024 жылы мамырда президент Ибрахим Раиси ұшақ апатынан қаза болғаннан кейін өткізіліп отыр.
Иранда президенттің өкілеті шектеулі, алайда ол Батыс елдерімен қарым-қатынасқа, жалпы сыртқы саясатқа әсер ете алады.
Кешегі сайлауда жеңген Масуд Пезешкианның мамандығы — дәрігер. Денсаулық сақтау саласында министр, басқа да басшылық қызмет атқарған.
