Қазақстанның экс-президенттері мен олардың отбасы мүшелерінің жеке өмірі және денсаулығы жайлы деректер мемлекеттік құпияға жатқызылмақ. Заңға осындай өзгертулер енгізу туралы заң жобасы 12 желтоқсанда парламент сенаты екі оқылымда мақұлдағаннан кейін президентке қол қоюға жіберілді.
Парламент мақұлдаған құжатта 1999 жылы қабылданған Қазақстан Республикасының «Мемлекеттік құпиялары туралы» заңының 14-бабына толықтыру енгізу көзделген.
«Мемлекеттік құпиялар туралы» заңына барлау, қарсы барлау, жедел-іздестіру және өзге де қызметтер саласындағы мемлекеттік құпияларға Қазақстан президентінің және оның отбасы мүшелерінің қауіпсіздігін қамтамасыз етудің ұйымдастырылуы, күштері, құралдары мен әдістері туралы, президенттің денсаулық жағдайы мен жеке өмірі туралы мәліметтерді, Қазақстанның бұрынғы президенттерінің және олардың отбасы мүшелері туралы дәл сондай мәліметтерді қосу бойынша толықтырулар енгізіледі», – деп жазылған «Қазақстан Республикасының кейбір заңнамалық актілеріне Мемлекеттік білім беру жинақтау жүйесі, ақпарат, қоғамдық даму, мәдениет және архив ісі салаларында артық заңнамалық регламенттеуді болғызбау мәселелері бойынша өзгерістер мен толықтырулар енгізу туралы» заң жобасының қорытындысында. Мемлекеттен қаржыландырылатын «ҚазАқпарат» агенттігі осылай деп хабарлады.
Қазақстанда әзірге бір ғана экс-президент бар.
