Президент кеңесшісі – Баспасөз хатшысы Руслан Желдібай «Бағанашыл» балалар үйі Алматыдан Қонаевқа көшірілмейтінін мәлімдеді. Бұл кезде балалар үйінің ауласына полиция күштері енгізілген болатын.
«Бағанашыл» балалар үйінің тәрбиеленушілерін Алматыдан Қонаев қаласына көшіруге байланысты жағдаймен танысқан Қасым-Жомарт Тоқаев Алматы қаласының әкімі Дархан Сатыбалдыға оқушылардың оңтүстік астанада білім алуын жалғастыру үшін балалар үйіне жөндеу жұмыстарын жүргізуді және аталған нысанды қаланың балансына алуды тапсырды, — делінген жазбада.
Баспасөз хатшысының жазуынша, президент тапсырған соң балалар үйі көшірілмейтін болған.
«Аталған жағдайға байланысты Президент Әкімшілігі қызметтік тексеріс жүргізеді. Ата-анасының қамқорлығынсыз қалған балалардың заң шеңберіндегі барлық құқығы толық сақталады,» — деген Руслан Желдібай.
Kazinform агенттінің хабарлауынша, балалар үйінің тәрбиеленушісі Кирилл Капранов әлеуметтік желіде бейнежазбасы кеңінен тараған жанжалдың қалай басталғанын былай түсіндірген
— Таңертең балаларды алып кетуге 3 автобус келді. Біз олардың кіргеніне қарсы болдық. Бірақ Кәмелетке толмағандарды бейімдеу орталығында уақытша тұрып жатқан 3-18 жасқа дейінгі балаларды алып кететін болып екі автобус кірді. Біріне – ұлдар, екіншісіне қыздар кірді. Сол кезде полиция да келді. Біз қалғысы келетін балалар болса, ойлансын деп автобусты жарты сағат жібермей бөгеп тұрдық. Сол кезде полиция қызметкерлері бізді итере бастады, — деген Кирилл Капранов.
