Дағыстандағы Дербент қаласында кеше кешке белгісіз біреулер автомат қаруымен шіркеу мен синагоганы атқылады. Бұл туралы Дағыстан ішкі істер министрлігіне сілтей отырып ТАСС агенттігі хабарлады. Шабуылдан соң синагога өртке оранды.
Шабуылдағандардың кім екені белгісіз, олар көлікке мініп қашып кеткен.
Соңғы мәліметттерге қарағанда шабуыл салдарынан кемінде 9 адам қаза болды, оның бірнешеуі – полиция қызметкері. Одан бөлек, 25 адам зардап шеккен. БАҚ шіркеу қызметкері көз жұмды деп хабарлады.
Дағыстан астанасы Махачкала қаласында да белгісіз адамдар жол полициясы қызметіне шабуылдаған.
Дағыстан қоғамдық бақылау комиссиясының жетекшісі Шәміл Хадулаевтың сөзінше, Дербентте шіркеу қызметкері өлтірілген, Махачкалада шіркеу күзетшісі қаза тапқан.
«Маған түскен ақпаратқа қарағанда, Дербент шіркеуіндегі Николай әкейді бауыздап өлтіріп кеткен. 66 жаста болатын, дімкәстігі бар еді. Махачкала-1 шіркеуінің газ тапаншасымен ғана қаруланған күзетшісі Михаилді атып тастаған. Дін қызметкерлері шіркеуде бекініп алған, көмек күтіп отыр» дейді ол телеграм-арнасында.
Терроризмге қарсы ұлттық комитеттің мәліметінше, жексенбі күні Дербент пен Махачкалада екі шіркеуге, бір синагогаға және жол полициясы қызметіне шабуыл жасалған. Тергеу комитеті теракт жөнінде қылмыстық іс қозғаған.
Ішкі істер министрлігінің кейінгі дерегіне қарағанда, Махачкалада шабуылдаған екі адам өлтірілген, кемінде екі адам «Березка» жағажайының аумағында ұсталған.
Ресей құрамындағы Дағыстанда Сергокалин ауданының басшысы және «Единая Россия» партиясының жергілікті бөлімшесінің хатшысы Магомед Омаров ұсталды. Полиция оның үйін тінткен.
Мемлекеттік ТАСС ақпарат агенттігінің хабарлауынша, Омаровтың екі ұлы және оның жиені синагога мен полицейлерге жасалған шабуылға қатысқан. «Интерфакс» сайты құқық қорғау органдарындағы аноним дереккөздерге сүйеніп, шабуыл жасағандар өлді және олардың кім екені анықталды деп хабарлады.
