Жазушы Мұхтар Мағауиннің 26 томдық толық шығармалар жинағы Қазақстанда басылып, оқырманға жол тартты.
26 томдық жинақ қазір Алматы, Астана, Түркістан, Қарағанды, Шымкенттегі кітап дүкендерінде сатылымға түсіп отыр.
Осыдан төрт жыл бұрын ғана, Америка Құрама штаттары, Мэриленд, Силвер Сприң қаласында, «Мagauin Publishing» баспа үйі арқылы, атақты қаламгердің сексен жасы, алпыс жылдық шығармашылық қызметінің мерейлі қорытындысы ретінде
шектеулі таралыммен жиырма бес томдық шығармалары жарыққа шыққан болатын.
Ал Қазақстанда жазушы еңбектері соңғы рет жинақталып, 13 том болып, 2002 жылы «Қағанат» баспасынан жарық көрген еді.
Жазушының magauin.com ресми сайтында жаңа басылымның өткен томдықтарды ешқандай өзгеріссіз, қаз-қалпында жарияланғаны жазылған. Бар айырма – жақында ғана жазылып біткен «Алтын Орда» шежіресінде екені белгілі болған. Ал толық жинақ жанрлық, хронологиялық негізде түзілген.
26 томда әрбір кітаптың көлемі 550-650 беттен тұрады. Тиражы – 2 мың дана.
Мұхтар Мағауин шығармаларының толық жинағын шығаруға белгілі кәсіпкер Ерлан Әшім демеушілік жасағаны айтылады.
