CNN телеарнасы мен New York Times басылымы Америка барлауындағы дереккөздерге сілтеп, АҚШ-тың Иранға жасаған соққысы Тегеранның ядролық бағдарламасының негізгі компоненттерін жоя алмады деп жазды.
Дереккөздің бірі АҚШ-тың соққысы Иранның ядролық бағдарламасын тек бірнеше айға кері «лақтырып тастады», қайта қалпына келтіруге болады деген. Енді бірі Иранның өндірілген уран қоры зардап шекпеді дейді. Бұған дейін Иран шабуыл алдында зауыттардан урандарын алып кетуі мүмкін екендігі айтылған еді.
«Алғашқы қорытындылар президент Дональд Трамптың Иранның ядролық бағдарламасы қайта қалпына келмейтіндей толығымен жойылды» деген мәлімдемелеріне қарама-қайшы» деп жазылған CNN мақаласында.
Осыдан соң АҚШ президенті Дональд Трамп Truth Social желісінде екі медианың жазғанын жоққа шығарып, «жалған ақпарат» деді.
«Жалған жаңалық тарататын CNN жолы болмайтын The New York Times-пен бірігіп, тарихтағы ең сәтті әскери соққының бірін жоққа шығаруға тырысты. Иранның ядролық нысандары толық жойылды! Қоғам CNN мен The Times-ды сынап жатыр,»- деп жазды ол.
Трамптың Таяу Шығыс бойынша арнайы өкілі Стив Уиткофф барлау деректерінің тарап кетуін «сатқындық» деп атады.
22 маусымда АҚШ Иранның Фордо, Натанз және Исфахан жерлеріндегі ядролық нысандарына соққы жасаған еді. Трамп бұл соққыдан соң Иранның ядролық бағдарламасы жойылды деген.
