Президент Қасым-Жомарт Тоқаев Ақордада Германия бундесратының президенті, Саар федералды жерінің премьер-министрі Анке Релингермен кездесу өткізді. Осы кездесуде Қазақстан басшысы елдің мемлекеттік құрылыс өзгермейтінін еске салды.
Президент Германияны Қазақстанның Еуропа Одағындағы негізгі стратегиялық серіктесі ретінде атап, Қазақстан экономикасындағы жетекші инвестордың бірі саналатынын айтты.
Мемлекет басшысы Қазақстанның экономикалық саясатының басым бағыттары жайында әңгімелеп берді.
– Қазір ірі инфрақұрылымдық жобаларды, цифрландыру және жасанды интеллектті дамытуға күш салу керек деп ойлаймыз. Сонымен қатар көлік-логистика және ауыл шаруашылығы салаларын да өркендету қажет, — деген Қасым-Жомарт Тоқаев.
Президент Қазақстанда соңғы жылдары ауқымды саяси реформалар жүргізіліп жатқанын айтты.
– Заңнамаға, ең әуелі, Конституцияға жасалған өзгерістер Қазақстанның жаңғыру жолына түбегейлі түскенін көрсетеді. Әрине, реформалар жалғасып жатыр. Құқық қорғау және сот жүйесіне де өзгерістер енгізілуі мүмкін. Бұл – өте маңызды. Бірақ мемлекеттің құрылымы, мен бұл жерде президенттік басқару жүйесі туралы айтып отырмын, бұрынғы қалпында сақталады. Өйткені қазіргідей алмағайып кезеңде мемлекеттің сипаты осындай болуға тиіс. Бұл біздің түсінігімізге сай келеді, — деді президент Тоқаев.
Германия бундесратының президенті Релингер Қазақстанды Германияның Орталықь Азия аймағындағы негізгі серіктесі ретінде атады.
Кездесуде Қазақстан мен Германия арасындағы сауда-экономикалық, инвестициялық және мәдени-гуманитарлық ынтымақтастықты нығайту мәселелері талқыланды.
