Қыркүйектің 2-сіндегі дәстүрлі жылдық жолдауында президент бұрынғы жүйеден немесе саяси тұлғалардан кінә іздемеу керектігін айтты.
«Ылғи да кейін қайырылып, өткенмен өмір сүруге, бұрынғы жүйеден немесе саяси тұлғалардан кінә іздей беруге болмайды. Өз халқыңның тарихын білу керек, бірақ одан тек еңсеңді түсіріп, өзгеге өкпе артуға себеп іздемеу қажет. Қандай қасіретті болса да, өткен оқиғалардан, ең алдымен, тағылым ала білген жөн», — деген Қазақстан басшысы Қасым-Жомарт Тоқаев.
Осыған жалғасы президент қоғамда заң мен тәртіп үстемдік құруға тиістігін еске салды.
«Бұл – бүкіл қоғамның және әр адамның қауіпсіздігін қамтамасыз етуге қатысты ең басты талап. Біз сонда ғана Әділетті, Таза және Қауіпсіз Қазақстанды құра аламыз. Осы стратегиялық мақсатымызға жету үшін еліміздің бейбіт өмір сүруіне және тұрақты дамуына қолайлы сыртқы жағдай қалыптастыруымыз қажет. Бұл – қазіргі аса күрделі геосаяси ахуал кезінде өте жоғары кәсібилікті талап ететін дипломатияның міндеті», — деген президент Тоқаев.
Мемлекет басшысы жолдауында бұрынғы биліктің кемшілігі немесе қоғамдағы орны жайында тоқталмаған. Қаңтар оқиғасы, елдегі қымбаттап жатқан азық-түлік бағасы, күнкөрістің төмендігі, тоқтамсыз жемқорлық, геосаяси жағдай, көрші елдерге салынған санкцияның салдары, адам құқығы және сөз бостандығы жайында президент Тоқаев жарытып ештеңе айтпаған.
