Ерболат Досаев Қазақстан президентінің жарлығымен Алматы қаласының әкімі қызметінен босатылды. 24 мамырда таңертең Ақорда сайтында тиісті жарлық жарияланды. Досаевтың қызметтен кету себебі нақты хабарланбады.
55 жастағы Ерболат Досаев 2022 жылғы Қаңтар оқиғасынан кейін Алматы әкімі болып тағайындалған еді.
Азаттықтың хабарлауынша, ол мемлекеттік қызметке 1990 жылдардың соңында келді. Үкімет пен қаржы секторында ірі лауазымды қызметтерді атқарды. Денсаулық сақтау, экономикалық даму, ұлттық экономика министрліктеріне жетекшілік етті. Әкім қызметіне тағайындалғанға дейін үш жыл ұлттық банктің төрағасы болды. 2006-2012 жылдары аралығында бизнеспен айналысқан. 2014 жылы қазақстандық Forbes журналы оны елдегі ең дәулетті 50 кәсіпкер қатарына енгізген.
Досаевтың аталған министрліктерді басқарған тұсында оңтүстікте 100-ден аса бала АИТВ-ға ұшырап, денсалуық сақтау саласы қатты сыналған. Кейін Досаевтың жерді аукционмен сату мәселесін көтеруі елеулі қарсылыққа тап болып, елдің әртүрлі аймақтарында «Жер митингісі» аталған наразылық шаралары өткен. Кейін наразылық талаптары орындалып, жер сатуға шектеу қойылған.
Репутациясы екіұдай Ерболат Досаевтың орнына Алматы әкімі болып Дархан Сатыбалды тағайындалды. 51 жастағы Дархан Сатыбалды бұған дейін президент әкімшілігі жетекшісінің бірінші орынбасары болған.
Биыл қаңтарда Ақорда «президенттің тапсырмалары мен шешімдерінің ауыл-аймақтарда орындалу барысын бақылауды күшейту, қабылданған іс-шаралардың сапасын жақсарту әрі азаматтардың мемлекеттік институттарға сенімін нығайту мақсатында» осындай қызмет (президент әкімшілігі жетекшісінің бірінші орынбасары) қайта енгізілгенін айтқан.
2025 жылдың қаңтарына дейін Дархан Сатыбалды 2022 жылдың тамызынан бері Түркістан облысын басқарған. 2022 жылы желтоқсанда бұл қызметке қайта тағайындалды.
Оған дейін 2019 жылдың наурызынан бері Қазақстанның Өзбекстандағы елшісі болған. Әр жылдары Оңтүстік Қазақстан облысы әкімінің бірінші орынбасары, Шымкент қаласының әкімі, ұлттық қауіпсіздік комитетінің департамент басшысы болған, сенат депутаты болып сайланған.
