Шамалған станциясының маңында орналасқан ұн өндіретін зауытта жарылыс болды.
Алматы облыстық төтенше жағдайлар департаментінің мәліметінше, 23 мамыр күні Қарасай ауданына қарасты Жібек жолы ауылында орналасқан ұн өнімдерін шығаратын зауыт аумағында жарылыс болып, өрт шықты.
Оқиға кезінде зардап шеккен 49 жастағы 1 адамның алған жарақаттардың салдарынан қаза тапқаны хабарланды. Алматы облыстық денсаулық сақтау басқармасынан мәлім еткендей, Қаскелең қаласындағы Қарасай клиникалық көпсалалы орталық аудандық ауруханасына 23 мамыр күні 4 адам жеткізілген. Зардап шеккен қызметкерлердің бірін аман алып қалу мүмкін болмады. 49 жастағы ер адамның денесін терең күйік шалған.
«Қалған үш адам жансақтау бөлімінде жатыр. Жағдайлары өте ауыр. Алматы облысының денсаулық сақтау басқармасы бұл науқастарды жеке бақылауына алып, дер кезінде диагноз қою және толық ем алу үшін қажетті шаралар қабылданып жатыр» деп хабарлаған басқармадан.
Ал облыстық төтенше жағдай департаментінің мамандары астық қалдықтарының шаң-тозаңы жарылысқа себеп болуы мүмкін дейді.
«Оқиға орнына дереу Алматы облысы төтенше жағдай департаментінің күштері мен құралдары жіберілді. Шұғыл штаб құрылып, өрт толық сөндірілді. Қызыл жалын 1377 шаршы метр аумақты шарпыды» делінген ресми мәліметте.
