25 шілдеде құтқарушылар қаңтар айында Майқайың кенішінде жер опырылғанда, ойық астында қалған төртінші адамды тапты. Бұл туралы kazinform агенттігі хабарлады. Төрт адам мен олар мінген автобусты тауып, қазып алуға 7 айдан астам уақыт кетті.
Автобус жүргізушісі Айып Тілеубергеновтің сүйегі 75 метр тереңдіктен табылып, сараптамаға жіберілді.
Қазу жұмысына әртүрлі қызметтен 200-ден астам адамның жұмылдырылғаны айтылады.
Еске сала кетейік, 4 қаңтарда Павлодар облысындағы Майқайың алтын кенішінде төрт адам мінген автобус аяқасты опырылған ойыққа құлады. Артынша оқиға орнынан екі адамның денесі табылған.
Кейін құтқарушылар топырақтың жиі қозғалуына байланысты қазу жұмыстарын тоқтатуға мәжбүр болған.
Ал мамыр айында Майқайың алтын кенішінде қос құтқарушыны іздеу жұмыстары қайта жанданды.
19 шілдеде Майқайыңда алты айдан соң үшінші құтқарушының мүрдесі табылған еді. Марқұм Айдос Шаймерденнің денесі 70 метр тереңдіктен қазып алынған.
25 шілдеде ойықта құрбан болған соңғы адамның сүйегі мен бірге автобус жоғары шығарылды.
Билік өкілдері таратқан хабарларда қазу жұмыстарының қатерлі болғаны айтылады. Құтқарушылар еңбегін ақтау сарынында таратылған сондай хабарларда жергілікті биліктің құрбандар жанұясына көңіл айтуы мен құтқарушыларға алғыс білдіргеніне басымдық берілген.
