«Бурабай» мемлекеттік ұлттық табиғи паркі инспекторлары мен оқушылар ағаш бұтағына байланған 15 000-нан астам шүберек, пакеттерді шешіп алды.
«Бурабай» МҰТП Бурабай орманшылығының инспекторлық құрамы Сәкен Сейфуллин атындағы жалпы білім беретін мектептің жоғары сынып оқушыларымен бірлесіп ұлттық парктің аумағында «Тыныста, тал-шыбық!» акциясын өткізді.
Олар «Аютас» жартасының маңындағы қарағай мен қайың бұтақтарын туристер таққан пластик пакеттерден, матадан, целлюлозадан және басқа материалдардан тазалады. Барлығы 15 000-нан астам байлау шешіліп алынды.
«Іс-шараның мақсаты — жасыл желекті қорғау. Адамдардың ырымдап таққан байлаулары өсімдіктердің еркін өсуіне кедергі келтіреді. Әр түрлі материалдардан жасалған заттар ағаштардың өсуі мен дамуын қиындатады, жарық пен көміртегін қабылдауына жол бермейді. Ағаш бұтағындағы материалдар ылғалды сіңіріп алады, бұтақтарды зақымдайды. Сонымен қатар, пластиктен байлаулар өте баяу ыдыра ды, экожүйе үшін ұзақ мерзімді проблема туғызады», — деп түсіндірді акция белсендісі Айбек Ақжүніс.
