Үкімет қосымша құн салығы бойынша межені бұрын ұсынылған 15 миллион теңгенің орнына 40 миллион теңге деп белгілеу туралы шешім қабылдады. Бұл жөнінде сәрсенбі күні ұлттық экономика министрі Сері Жұманғарин мәлімдеді, деп хабарлайды Азаттық радиосы.
15 млн теңгелік межеге кәсіпкерлер мен парламенттегі екі партия өкілдері қарсы шыққан.
“Бірінші, қосымша құн салығы 16 процент болады. Екінші, қосымша құн салығының шегі 40 млн теңге мөлшерінде белгіленеді. 40 млн теңге деген ортақ байлам болды. Үкімет пен депутаттардың конструктивті ұстанымының арқасында осындай ымыраға қол жеткіздік. Бірақ мұндай шек болғанда 160 мың салық төлеушіден айырылатынымызды айтқым келеді. Сондайда шамамен 400 млрд теңгедей қосымша бюджет түсімінен қағыламыз. Біздің бизнесмендер үкімет те, парламент те осындай ымыраға баруға дайын екенін түсінсін деп айтып тұрмын», — деді ол.
Қазіргі қолданыстағы заң бойынша, жылдық тауар айналымы 73 млн 840 мың теңгеден асатын кәсіпкерлер ғана қосылған құн салығын төлеуге міндетті. Бұған дейін үкімет салықтың бұл түрін жылдық тауар айналымы 15 млн теңгеден басталатын кәсіпкерлерге енгізуді ұсынған.
Жұрт әлеуметтік желіде үкіметтің бастамасын сынға алған. Сарапшылар салық ауыртпалығы қатардағы тұтынушыға да түсетінін ескерткен.
Қазақстан президенті Қасым-Жомарт Тоқаев 7 ақпанда елдегі бизнес өкілдерімен кездесуде үкімет ұсынған ҚҚС мөлшері тым жоғары деп, бұл мәселені зерттеуді әрі биыл нақты шешім қабылдауды тапсырған.
Қосымша құн салығы – Қазақстанда сатылатын тауарлар (отандық және шетелден әкелінген) мен көрсетілетін қызмет бағасына қосылған жанама салық түрі. Бұл — мемлекеттік бюджет кірісінің маңызды көздерінің бірі.
