Талғарда жанжал кезінде пышаққа түсіп мерт болған Шерзат Полаттың әкесі Қаржаубай Нұрымовты полиция ұстады. 10 желтоқсанда Алматы облысы Азат ауылында Нұрымовтар отбасы туысы Нұрғанат Ғайыпбаевты ақтық сапарға шығарып салды. Алдымен ұлынан, енді інісінен айырылған Қаржаубай Нұрымов көпшілік алдында журналистермен кездесуді талап еткен.
Азаттық радиосының хабарлауынша, 10 желтоқсанда Алматы облысының полициясы «Азат ауылында жерлеу рәсімін өткізу кезінде қоғамдық тәртіп пен айналадағы адамдарға, оның ішінде кәмелетке толмаған балаларға қауіп төндірген оқиға болды» деп хабарлады.
«Н. есімді азамат прокурордың заңды сақтау туралы түсіндірмесін елемей, өзін агрессивті ұстады, айналасындағы адамдарға қауіп төндіріп, суицид жасаймын деп қорқытты. Полиция қызметкеріне пышақпен шабуыл жасады. Оның мінез-құлқы өзіне де, айналасындағы жандарға да қауіп төндірді. Оның жағдайына алаңдаған туыстары мен адвокаттарының өтініші бойынша полиция Н. есімді азаматты ұстады», – деді полиция.
Желіге тараған видеода Қаржаубай Нұрымовтың әділ тергеу жүргізуді талап етіп тұрған видеосы тарады. Тағы бір видеода Нұрымовты «ағам» деп атаған әйел оның «өзіне өзі қол салмақшы» болғанын айтады.
Ресми ақпаратта Қаржаубай Нұрымов полиция бөліміне жеткізіліп, онымен психологтар жұмыс істеп жатқаны айтылған. Бұдан екі ай бұрын Нұрымовтың жасөспірім ұлы кісі қолынан мерт болған, ал кеше ол інісінен айырылды.
9 желтоқсанда таңертең Алматы облысының полициясы Талғар қаласы маңынан өлі табылған 30 жастағы ер адам – биыл күзде Талғардағы жанжал кезінде қаза тапқан Шерзат Полаттың ағасы екені анықталды деп хабарлады.
«Алдын ала мәліметтерге сәйкес, ол асылып, өзіне қол жұмсаған» деген полиция. Марқұм Шерзаттың отбасы Нұрғанат Ғайыпбаевтың «өзіне өзі қол салғанына» сенбейді.
