Алматы облысының қылмыстық істер жөніндегі мамандандырылған ауданаралық сотында алқабилердің қатысуымен Кәрім Көкірекбаев, оның орынбасары Әділет Ахатаев пен мердігер Андрей Поплавскийге қатысты қылмыстық іс қаралып, үкім шықты.
Сотқа сілтеме жасап Kazinform хабарлағандай, Кәрім Көкірекбаев пен Әділет Ахатаев лауазымды тұлғалар бола отырып, ЖШС директоры Андрей Поплавскиймен сөз байласып, орындалған жұмыс актілеріне кедергісіз қол қою үшін одан аса ірі мөлшерде пара алған.
Сондай-ақ, Андрей Поплавский шын мәнінде орындалмаған құрылыс-монтаж жұмыстарының актілеріне қол қоюды ұйымдастырған. Осы әрекеттердің салдарынан мемлекеттік мекемеге 1 987 827 622,63 теңге көлемінде залал келтірілген.
Алқабилердің үкімімен Кәрім Көкірекбаев мен Әділет Ахатаев Қылмыстық кодекстің 366-бабының 4-бөлігі бойынша, ал Андрей Поплавский — 195-бабының 4-бөлігінің 2) тармағы және 367-бабының 4-бөлігі бойынша кінәлі деп танылды.
Алматы облысының қылмыстық істер жөніндегі мамандандырылған ауданаралық сотының баспасөз қызметінің хабарлауынша, сот үкімімен Кәрім Көкірекбаев — 12 жылға, Әділет Ахатаев пен Андрей Поплавский 11 жылға бас бостандығынан айыру жазасына кесілген. Сотталғандар өмір бойына мемлекеттік қызметте лауазымды қызмет атқару құқығынан айырылған.
«Қазселденқорғау» мекемесінің басшысы қызметін атқарып, пара алу кезінде ұсталған Кәрім Көкірекбаев бұрын Жамбыл облысының әкімі, Қазақстанның Қырғызстандағы елшісі, ҚТЖ басшысы қызметтерін атқарған.
