Мәжіліс депутаты Ермұрат Бапи Youtube желісіндегі «Бәсе» каналының авторы Киевте қастандыққа ұшыраған Айдос Садықовқа жасалған шабуылға үшінші елдерді кінәлап отыр. Бұл туралы 20 маусымда Orda.kz хабарлады
Киевте тұратын журналист Айдос Садықовты 18 маусым күні үйінің жанында көліктің ішінде әлдебіреулер атып кеткен болатын.
Ол қазір ауруханада жатыр, жағдайының өте ауыр екені айтылады.
Ал депутат Ермұрат Бапи оппозициялық журналистке жасалған қастандықты үшінші елдер ұйымдастыруы мүмкін деп санайды.
«Болған оқиға қорқынышты. Тапа-тал түсте адамға шабуыл жасалды. Бұл жерде әлдебір саяси астар жатқан сияқты. Бізді бір-бірімізге қарсы қоюды мақсат еткен үшінші елдердің қатысы бар шығар. Мен Айдосты жақсы білемін. Оның үстінен қылмыстық іс қозғалғанда біз оны қолдап, сұхбатын жарияладық. Мен Наталья Садықованы да білемін. Қалай болғанда да, «Бәсе» оппозициялық ақпараттық ресурс болып табылады. Дегенмен бұл ресурс саясатты өзгерту немесе елдің ішкі істеріне араласу мақсатын көздемейді», — дейді депутат.
Журналистің әйелі Наталья Садықова оқиғаға Қазақстан билігін кінәлаған болатын. Бірақ депутат Бапи онымен келіспейді.
«Биліктің бұған еш қатысы жоқ. Не үшін? Мемлекет әсіресе халықаралық деңгейде арандатушылық тудыруға мүдделі емес. Айдос саясаткер емес, журналист. Ал үшінші күштер Қазақстан мен кейбір мемлекеттер арасында жанжал шығарғысы келіп, қастандық ұйымдастырды», — дейді Ермұрат Бапи.
Депутат осы айтқан сөздеріне дәлел келтіріп, неге сүйенгенін айшықтамаған.
Бұдан алдын Қазақстан президентінің баспасөз хатшысы Берік Уәли «Ел басшылығының стратегиялық бағытын, оның ішінде сыртқы саясат саласында Қазақстанның атына қысым жасауға тиімді пайдаланатын күштер бар» деп болжап тастаған болатын.
Ал президент Қасым-Жомарт Тоқаев Киевте жасалған қастандық жайында «дипломатиялық арналар мен құқық қорғау органдары арқылы осы оқыс оқиға бойынша Украина тарапына ресми сұрату жіберу туралы нақты тапсырма бергенін, қажет болған жағдайда Қазақстанның ресми органдары істің ақиқатына жетуге жәрдем беру үшін тергеу жұмысына қатысуға дайын» екенін мәлімдеген.
