Президент Қасым-Жомарт Тоқаевтың жиеншары Нұрасыл Медеу Азаттық зерттеуінде айтылған екі оқу орнының бірін мемлекетке өткізетінін мәлімдеді.
Осы мәлімдеменің алдында ғана Азаттық радиосы зерттеуінде 23 жастағы Нұрасыл Медеудің екі оқу орнына иелік ететіні жарияланған болатын. Оның бірі Жасанды интеллект ұлттық зерттеу университеті болса, екіншісі Қазақ ұлттық спорт университеті. Зерттеуде оқу орнының ғимараты мәлімдемеге дейін де мемлекетке қарайтыны айтылған.
Осындай жағдайда 17 қазанда президенттің туысының Қазақ ұлттық спорт университетін (KNUS) мемлекетке «өтеусіз беру жөнінде шешім қабылдағаны» жөнінде осы университеттің ресми сайтында жарияланды.
Сайттың жазуынша, Нұрасыл Медеу оқу орнында өткен салтанатты жиын кезінде «Кез-келген алыпқашпа әңгімеге нүкте қойғым келеді. Бұл – сату да емес, сенімгерлік басқаруға беру де емес, мәжбүрлі түрде жасалған қадам да емес,»- деп атап өткен.
Ол «студенттер алдындағы барлық міндеттеме толық көлемде сақталатынын», «бұрын тағайындалған құрылтайшы гранттары бойынша міндеттемелер де» орындалатынын айтып отыр. «Қазақстанның болашағына осындай үлес қосу мен үшін үлкен мәртебе. Біз құрғанның барлығы жастарға, отандық спортқа және елімізге қызмет етуі керек», — деген университет «негізін қалаушы» ретінде аталатын Нұрасыл Медеу. Оқу орнын мемлекетке өтеусіз беру бастамасы ресми БАҚ-та спорттық білім беру жүйесін дамытуға, жас мамандарды даярлауға және спорт ғылымын ілгерілетуге бағытталған қадам ретінде аталған.
Мұндай мәлімдеме Азаттықта жарияланған зерттеуден бір күн өткеннен кейін жарияланғаны назар аудартады.
Зерттеуде президент Қасым-Жомарт Тоқаевтың жиені, құрылтай депутаты Дана Медеуованың ұлы 23 жастағы Нұрасыл Медеудің мемлекет қолдауына ие екі оқу орнына — Жасанды интеллект ұлттық зерттеу университеті мен Қазақ ұлттық спорт университетіне — иелік ететіні айтылады. Екі университеттің де 95 пайыз үлесі Медеуге тиесілі, ал қалған 5 пайызы мемлекеттік компаниялардың еншісінде.
Зерттеу авторлары оқу орындарының мемлекеттік инфрақұрылым мен қолдауды пайдалануына байланысты ықтимал мүдделер қақтығысы туралы сұрақ көтереді. Нұрасыл Медеу бұл жетістікке «командасының көмегімен» жеткенін, өзіне ешқандай «артықшылықтар берілмейтінін», ал университеттердің инфрақұрылымы мемлекет меншігінде қалатынын айтқан.
