Қазақ-қырғыз шекарасында, Жамбыл облысында ресейлік рэпер Наваи Бакиров — Navai ұсталғаннан кейін Ресейдің Алматыдағы бас консулдығы Қазақстанның Астанадағы сыртқы істер министрлігіне нота жолдады.
Ресейлік дипломаттар болған оқиғаны БАҚ-тан білгенін, ал Қазақстан билігінен ресми ескерту алмағанын баяндаған.
«Нота жолдадық, өйткені бұл — жергілікті билікпен ресми байланыс орнатудың тәсілі. Жағдайды нақтылап, Ресей азаматының қазір қайда екенін, қандай жағдайда ұсталғанын және басқа да мән-жайды анықтауды сұрадық. Қажет болған жағдайда онымен консулдық кездесу ұйымдастыруға рұқсат сұраймыз», — делінген Ресейдің бас консулдығының хабарламасында.
Ресейлік рэпер Navai 13 қазанда Қордай арқылы Қазақстанға кірмек болған кезде ұсталған. Жамбыл облыстық полициясының хабарлауынша, оның көлігінен есірткі табылған. Рэпер есірткі контрабандасы күдігіне ілініп отыр.
15 қазанда сот оны екі айға қамауға санкция берген. Адвокаттары шешімге шағым түсірді. Ал рэпердің 14 қазанда Астанада өтуі керек концерті тоқтатылды. Концерттің басталуына төрт сағат қалған кезде ғана шара кейінге шегерілгені белгілі болды.
