Алматыдағы Адам құқығын қорғау бюросында түрмедегі журналист әрі белсенді Думан Мұхаммедкәрімге қатысты баспасөз конференциясы өтті. Жиынға Думан Мұхаммедкәрімнің әкесі Алмас Тілепов, адвокаты Ғалым Нұрпейісов және қоғам белсендісі Рысбек Сәрсенбайұлы қатысты.
Белсендінің әкесі Алмас Тілепов ұлымен кездесе алмай жүргенін айтты. «Қызылордаға барғаннан бері ұлымды бір-ақ рет көрдім. Ұлыммен жолығуға толық құқым бар еді… Шешесі ауру. 1 жыл 8 айдан бері шешесімен сөйлестірмеді. Бұл — қатігездік, адамды қинау», — деді ол.
Алмас Тілепов жақында Қызылорда түрмесіне барып қайтқан. Алайда түрме басшылығы ұлымен кездестірмеген.
Осы баспасөз мәслихатында Рысбек Сәрсенбайұлы Думан Мұхаммедкәрім батарейка мен оттық жұтқанын айтты
«Думан Мұхаммедкәрім батарейка мен оттық жұтқан. Думанды осыған жеткізді, мәжбүрледі», — деді ол.
Бұған дейін Қызылорда облыстық қылмыстық атқару жүйесі департаменті «Думан Мұхаммедкәрім денсаулыққа зиян келетін заттар жұтты» деген ақпаратты терістеген.
Думан Мұхаммедкәрім — журналист, белсенді. Ол бірнеше телеарнада жұмыс істеп, кейін «Не дейді?» You-Tube арнасын ашты. Бұл арнада саяси мәселелерді ашық талқылаған. Ол You-Tube арнасына Қаңтар оқиғасына қатысты көптеген видео жүктеп, билікті ашық сынаған. Ол 2023 жылы ұсталып, 2024 жылы жеті жылға сотталды.
Журналист «Экстремизмді қаржыландырды» және «Тыйым салынған ұйым ісіне араласты» деп айыпталды. Журналистің сотталуына Мұхтар Әблязовтан алған сұхбаты себеп болған.
