Қазақстан сыртқы істер министрлігі ел аумағы Ресейдегі нысандарға шабуыл жасаған ұшқышсыз ұшу аппараттарын ұшыру үшін пайдаланылуы мүмкін деген ақпаратты теріске шығарды.
Kazinform агенттігінің ведомствоға сілтеп хабарлауынша, соңғы күндері кейбір БАҚ Қазақстан аумағына қатысты «арандатушылық сипаттағы» мәліметтер таратқан.
«Сыртқы істер министрлігі аталған мәлімдемелердің шындыққа жанаспайтынын және ешқандай деректермен немесе фактілермен расталмайтынын мәлімдейді», — делінген ресми хабарламада.
Ел министрлігі мұндай жарияланымдарды Қазақстан мен Ресей арасындағы дәстүрлі «достық қатынастың сипатын бұрмалауға бағытталған негізсіз жорамалдар» деп бағалады.
Министрлік Қазақстанның тату көршілік, өзара құрмет және мемлекеттердің ішкі істеріне араласпау қағидаттарына негізделген бейбітсүйгіш әрі теңгерімді сыртқы саясат жүргізіп отырғанын атап өтті.
«Қазақстан Республикасы өз аумағының, әуе кеңістігінің және инфрақұрылымының басқа мемлекеттерге қарсы бағытталған іс-қимылдарды жүзеге асыру үшін пайдаланылуына жол бермеу қағидатын берік ұстанатынын тағы да атап өтеміз,» — делінген хабарламада.
Осыған байланысты ведомство БАҚ өкілдері мен өзге де тұлғаларды тек тексерілген деректерге сүйенуге және шындыққа сәйкес келмейтін ақпарат таратпауға шақырған.
Соңғы кезде Украина Ресейдің Қазақстанмен шектесетін тұстағы стратегиялық нысандарын атқылап жатқаны белгілі. Украинадан ұшатын дрондардың 2,5 мың шақырымды еңсеретіні айтылады.
