Павлодар облысында АН-2 ұшағы апатқа ұшырады. Салдарынан бір ұшқыш қаза тауып, екіншісі ауруханаға жеткізілген.
Көлік министрлігінің мәліметінше, оқиға 27 мамырда Павлодар облысындағы Железинка ауылының маңында болған. «Жеңіл және аса жеңіл авиация пайдаланушылары» (ЭЛИСА) заңды тұлғалар бірлестігі пайдаланатын АН-2 әуе кемесі авиациялық-химиялық өңдеу жұмыстарын жүргізгенде апатқа ұшыраған. Алдын ала мәліметтер бойынша, ұшақ электр желілеріне тиіп кеткені жайлы айтылады.
Бортта экипаждың екі мүшесі болған. Оқиға салдарынан бір ұшқыш қаза тапты. «Екінші ұшқышты ТЖД қызметкерлері шығарып алды. Ол есін жоғалтпаған», — делінген хабарламада.
Көлік министрлігі авиациялық оқиғаны көліктегі оқиғалар мен инциденттерді зерттеу департаментінің мамандары тексеретінін мәлімдеген. Көліктегі полицияның жергілікті бөлімі ұшақ апаты дерегі бойынша қылмыстық іс қозғаған. Тергеу жүріп жатыр.
