7 мамырда жаңадан құрылған «Әділет» партиясына президент Қасым-Жомарт Тоқаевтың әкімшілігін басқарған Айбек Дәдебай төраға болды. Партияның құрылуын, қарарын, төрағасын делегаттар бірауыздан мақұлдады.
Бұл туралы Азаттық радиосы хабарлады.
Астанада «Әділет» партиясын құру бойынша құрылтай өтіп, жиында 931 делегаттың барлығы партияның құрылуын қолдады. Жаңа партияның саяси кеңесінің құрамының басында бірнеше күн бұрын президент әкімшілігі басшысы қызметінен босатылған Айбек Дәдебай тұр. Яғни, ол партияны басқарады.
Бұған дейін Ақорда Дәдебайдың «саяси-қоғамдық жұмысқа ауысатынын» айтқан еді.
Құрылтайда бір ауыздан партия төрағасы болып бекітілгеннен кейін Дәдебай сөз сөйлеп, «Өздеріңіз сенім артып, партия төрағасы болып сайлану – мен үшін мәртебе және аса жауапкершілік. Партияны құрудағы мұратымыз – мансап та, атақ та емес. Біз әділетті ел, әділетті қоғам құру үшін біріктік. Сол ортақ талабымыз оң болсын. Басты идеямыз – әділдік. Біз үшін әділдік әсте жалаң ұран емес, ол – мемлекетіміздің тұрақтылығының негізі, қоғамдағы сенім, әр азаматтың мемлекетке деген сенімінің айнасы», — деген.
46 жастағы Айбек Дәдебай 2 күн бұрын ғана президент әкімшілігінің басшысы қызметінен босатылған. Сонда Ақорданың баспасөз хатшысы Айбек Смадияров президент оның атқарған жұмысына жоғары баға бергенін айта келіп: «Алдағы уақытта Қазақстанда үлкен саяси кампания өткелі тұр. Осындай маңызды әрі жауапты кезеңде Айбек Дәдебай президенттің жеке тапсырмасы бойынша қоғамдық-саяси бағыттағы жұмыстарды қолға алады», — деп мәлімдеген.
