Президент Қасым-Жомарт Тоқаев 21 наурызда Түркістанға сапарлап, көпшілік алдында сөйлеген сөзінде Таяу Шығыс келіссөзіне Қазақстан алаң ұсына алатынын айтты.
Қазақстан қақтығыс болып жатқан аймақтың бір бөлігі екенін айтқан президент Астана бұл күрделі ахуалда дәнекер болмайтынын, бірақ бейбіт келіссөз үшін алаң ұсынуға дайын екенін атап өтті.
— Сондықтан осы қастерлі жерден барлық елдерге халықаралық қауымдастыққа үндеу жасағым келеді. Ең алдымен, азаматтық, экономикалық нысандарға қарулы шабуылдарды тоқтату керек. Содан соң келіссөздерді бастау керек. Қазақстан бұл күрделі ахуалда дәнекер болғысы келмейді, бірақ, өзіміздің жерімізді бейбіт келіссөздер үшін ұсынуға дайынбыз. Меніңше, Түркістанда осындай келіссөздер өткізуге болар еді. Алайда, бұл мәселе қақтығысқа тікелей қатысып отырған мемлекеттерге байланысты. Ең алдымен олар оң шешім қабылдауы керек. Ал менің ұсынысым бұл — қазақ халқының ізгі ниетінің көрінісі. Әбден кеш болмай тұрғанда қарулы іс-әрекеттерді доғарып, келіссөздерді бастау қажет сияқты, әйтпесе, әлемдік экономиканың дағдарысқа ұшырауын айтпағанда, көптеген халықтың бейбіт өмірі, тыныштығы бұзылады, дүние жүзіндегі тұрақтылықтың тұғыры шайқалады, — деген президент Тоқаев.
— Баршаңызға белгілі, соңғы жылдары халықаралық геосаяси ахуал аса күрделі және құбылмалы. Көптеген елдерде қарулы қақтығыстар, тіпті, соғыстар болып жатыр. Бұл үдерістер әлем экономикасына кері әсерін тигізіп отыр. Оны біз Таяу Шығыстағы соғыстан көріп отырмыз. Соғыс әбден шиеленісіп кетті. Меніңше, бұл қақтығыста ақыры еш мемлекет өз пайдасына қол жеткізе алмайды, — деп қосты Қазақстан басшысы.
28 ақпанда АҚШ және Израиль Иранға шабуылдап, аятолла Хаменеидің көзін жойды. Содан бері Таяу Шығыс аймағы күнде зымыран және дрон атысынан көз ашпай келеді.
