Алматыда Назарбаев зияткерлік мектебінде оқу жылының аяқталуына екі күн қалғанда мектептен шығып қалған 11 сынып оқушысы ел президентіне видео-үндеу жолдады. Онда оқушы оқуын осы мектепте бітіруге мүмкіндік беруін сұраған.
Назарбаев зияткерлік мектебінің 11 сынып оқушысының оқудан шығарылуына қатысты жанжал қоғамда резонанс тудырды. Әсіресе, әлеуметтік желіде оны қолдаушылар да, оған қарсы әрекетті жақтаушылар да табылады.
Жасөспірімнің өзінің айтуынша, оның ата-анасы оқудан шығару туралы өтінішке оның мәнін толық түсінбей қол қойған. Оқушы ата-анасы орыс тілін білмейді және эмоциялық қысымға ұшырады деп санайды.
Айтуына қарағанда, олар құжатын қайтарып алмақ болғанда, мектеп оны беруден бас тартқан. Мектеп оқушысының өзі мектеп басшылығы жалған ақпарат таратып жатыр деп отыр. Ол басқа мектепке ауыстыру “мемлекет қаражатын екі есе ысырап ету» деп санайды.
Оқушы жазаны көтеруге дайын екенін, бірақ Назарбаев мектебінде қалып, мектеп бітіру мүмкіндігін сұрап отыр.
«Мен іс-әрекетімнің салдарын жоюды сұрамаймын. Егер маған осы мектепте қалуға және оқуымды жалғастыруға мүмкіндік берілсе, тәртіптік жазаға, қоғамдық жұмыстарға немесе басқа да шараларға дайынмын. Мен мұғалімдерге, мектепке және қоғамға алғыс айтамын және бір ғана нәрсе: әділ шешім және қатені түзету мүмкіндігін қарастыруды сұраймын», — деген 11 сынып оқушысы.
23 мамырда Алматыдағы Назарбаев Зияткерлік мектебінің 11 сынып оқушысы оқудан шығарылған. Назарбаев зияткерлік мектебі басқарма төрағасы Әнуар Жанғозиннің айтуынша, мектептегі тоқсандық қорытынды бағалау кезінде 11 сынып оқушысы академиялық адалдық ережесін бұзып, емтихан кезінде ұялы телефон қолданған. Бұл — мектепте қатаң тыйым салынған әрекет. Телефон тәртіпке сай тәркіленген сәтте оқушы агрессия танытып, мұғалімге бейәдеп сөз айтып, балағаттаған делінеді.
