Сәуірдің 4-інде Самарқанда өткен «Орталық Азия – Еуропа одағы» саммитінде Еуропа одағы құны 12 миллиард еуро болатын «Ғалам қақпасы» инвестициялық пакетін ұсынды. Бұл екі аймақ арасындағы транспорт байланысын арттырып, маңызды шикізат өндірісі, цифрлық байланыс, су және энергия саласындағы әріптестікті нығайтуға бағытталмақ.
«Бұл инвестиция екі жаққа да пайда келтіреді, себебі біздің серіктеріміз өсіп, гүлденсе, Еуропа да гүлденеді» деді Еуропа комиссиясының президенті Урсула фон дер Ляйен.
Бұл жөнінде тұңғыш рет өткізілген «Орталық Азия – Еуропа одағы» саммитінде тараған бірлескен баспасөз хабарламасында айтылған.
«Соңғы жылдары жоғары деңгейде екіжақты байланыстар артқандықтан әрі көпжақты, аймақтық күн тәртібі жылдам өзгеріп жатқандықтан Еуропа одағы мен Орталық Азия елдерінің басшылары екі өңір арасындағы қарым-қатынасты стратегиялық әріптестік орнату жолымен жоғары деңгейге көтеруге уағдаласты» делінген хабарламада.
Саммит соңында стратегиялық әріптестік орнату бойынша шешімді Өзбекстан президенті Шавкат Мирзияеев «тарихи қадам» деп атады.
«Арамыздағы стратегиялық әріптестік нақты шешімдермен, жоба, бағдарламалармен толығуы керектігіне сенімдімін,»- деген Өзбекстан президенті.
Еуропа одағы мен Орталық Азия сауданы арттырып, «адамдар арасындағы байланысты кеңейтеді» деді Еуропа кеңесінің президенті Антониу Кошта. Ол Еуроодақ аймақтың «тұрақты дамуына инвестиция салып», оның «сенімді серіктесі болып қала береді» деді.
Орталық Азия – Еуропа одағы саммиті Өзбекстанның Самарқан қаласында 3-4 сәуірде өтті. Оған Еуропа кеңесінің президенті Антониу Кошта, Еуропа комиссиясының президенті Урсула фон дер Ляйен және Қазақстан, Қырғызстан, Өзбекстан, Тәжікстан, Түркіменстан президенттері қатысты.
Еуропа одағы — 27 елдің басын қосатын саяси-экономикалық одақ. Ол АҚШ пен Қытайдан кейінгі ірі экономика саналады.
