Даулы шенеунік Мұрат Нұртілеу «ұсталғаны » жөнінде сыбыс тарағаннан кейін шамамен екі аптадан кейін қызметінен босатылды. Оның орнын бұрынғы вице-премьер Ермек Көшербаев басты.
Мұрат Нұртілеудің сыртқы істер министрі қызметінен босатылғаны жөнінде жарлық 26 қыркүйекте таңертең Ақорда сайтында жарияланды. Нұртілеу президенттің халықаралық инвестиция және сауда ынтымақтастығы жөніндегі көмекшісі болып тағайындалды.
Оның орнын Ермек Көшербаев басты. Ол 2025 жылдың ақпанынан бері премьер-министрдің орынбасары қызметін атқарған. 2023-2025 жылдары аралығында Шығыс Қазақстан облысын басқарған. Оған дейін 2020-2023 жылдары Қазақстанның Ресейдегі төтенше және өкілетті елшісі болған. Оның алдында шамамен екі жыл сыртқы істер вице-министрі мен жауапты хатшы қызметтерін атқарған.
Жұма күні сонымен бірге Ержан Қазыхан президенттің халықаралық мәселелер жөніндегі көмекшісі қызметінен алынып, Женева қаласындағы (Швейцария) БҰҰ-ның бөлімшесі мен басқа да халықаралық ұйымдар жанындағы Қазақстанның тұрақты өкілі лауазымына тағайындалғаны белгілі болды. Осы күні Ержан Ашықбаев Қазақстанның АҚШ-тағы елшісі қызметінен босатылды. Ол бұл қызметті 2021 жылдан бері атқарған.
Президент 25 қыркүйек күні өзінің бес көмекшісі мен кеңесшісін қызметінен босатқан болатын.
Ал Мұрат Нұртілеу шамамен екі апта бұрын оның «ұсталғаны » жөнінде сыбыс тарағаннан кейін қызметінен босатылып отыр. Бұған дейін Orda.kz басылымы сыртқы істер министрі Мұрат Нұртілеу мен кәсіпкер Гаджи Гаджиев және ҰҚК-нің бірқатар қызметкері ұсталған деп хабарлаған. Бірақ ресми органдар ақпаратты дереу жоққа шығарған. Басылымның айтуынша, Қаңтар оқиғасынан кейін қысқа уақыт ҰҚК төрағасының орынбасары қызметін атқарған Нұртілеу Гаджиевтің көмегімен арнайы қызмет ішінде көлеңкелі құрылым құрған. Ол Нұртілеудің мүддесі үшін аңдумен айналысқан, өздеріне жақпайтындарды қудалаған делінеді.
