Бішкекте Қырғызстан және Тәжікстан басшылары Садыр Жапаров пен Эмомали Рахмонов мемлекеттік шекара туралы келісімге қол қойды. Тәжікстан президенті тұңғыш рет Бішкекке мемлекеттік сапармен барып отыр.
Азаттықтың хабарлауынша, аталмыш құжатқа қол қоярдың алдында тараптар саяси, экономикалық салада екіжақты қарым-қатынасты талқылап, сонымен бірге білім, мәдениет саласындағы ынтымақтастықты сөз еткен.
Енді мемлекеттік шекара туралы келісімді екі елдің парламенті бекітуі керек. Одан кейін президенттер қол қойғаннан кейін заң күшіне енеді.
Қырғыз-тәжік шекарасының ұзындығы 1 мың 6,84 шақырым. 519,9 шақырымы 2011 жылға дейін анықталып қойған. Ал 486,94 шақырымы кейінгі үш жылда анықталған.
Шекара нақтыланбағандықтан мұнда су, жер, жол және жайылым бойынша дау болып, кикілжіңге ұласқан жағдайлар жиі болған. Ең үлкен қақтығыстар 2021 жылғы сәуір-мамыр айларында және 2022 жылғы қыркүйекте болған. Осы қақтығыстар кезінде қан төгіліп, ондаған адам қаза тапқан.
