«Дикий Арман» лақап атымен танымал Арман Жұмагелдиевке қатысты сот үкімі шықты. Сот Арман Жұмагелдиевті 20 жылға бас бостандығынан айыру туралы шешім қабылдады.
Бұл туралы kazinform агенттігі хабарлады.
Толықтай алғанда Алматыда 2022 жылғы Қаңтар оқиғасы кезінде «адам ұрлау», «билігін асыра пайдалану», «жаппай тәртіпсіздікке қатысу» қылмысты әрекеттерге қатысы бар деген айып тағылған 44 адамға сот үкімі шығып отыр.
Сот үкімі бойынша Арман Жұмагелдиевке түрлі ұйымдарға мүше болуға, іс-шаралар ұйымдастыруға және бұқаралық ақпарат құралдары, әлеуметтік желілерде жазба жариялауға тыйым салынды.
Еске салайық, 2022 жылы Алматыда полицейлер қылмыс әлемінің беделдісі Арман Жұмагелдиевті ұстаған болатын.
Кейін ҚР Бас прокуратурасы «Дикий Арман» тобы 24 бейбіт тұрғынды ұрлап, күштеп ұстағанын айтты.
2023 жылы қыркүйек айында Алматы маңындағы № 72 түзеу мекемесінің тергеу изоляторында мәслихаттың экс-депутаты Қайрат Құдайберген мен Арман Жұмагелдиевке қатысты сот процесі басталған.
Бүгінгі сотта Қайрат Құдайбергеннің де ісі қаралды. Алматы мәслихатының бұрынғы депутаты сот үкімімен 8 жылға бас бостандығынан айрылды.
Ал ҰҚК бесінші департаментінің бұрынғы басшысы Руслан Ысқақов 15 жылға 6 айға бас бостандығынан айырылды және мемлекеттік наградалардан айрылды.
Еске салайық, 2022 жылдың сәуір айында кәсіпкер, Алматы қаласы мәслихатының депутаты Қайрат Құдайберген Қаңтар оқиғасы кезінде жаппай тәртіпсіздіктерді ұйымдастыру мен оған қатысты деген күдікпен ұсталды.
Алдын ала тергеу бойынша Қ.Қ. Құдайберген А.Б. Жұмагелдиевпен («Дикий Арман» деп аталатын) бірге «Қазақстан» қонақ үйінде адам жинауды ұйымдастырып, Жұмагелдиевтің айналасына бірігуге, оны қолдауға және биліктің бірыңғай талаптарын ұсынуға шақырғаны, сондай-ақ 10 адамнан «ұяшықтар» бойынша бөліп және олардың топтарының ерекшеліктерінің белгісі ретінде қолдарына ақ таңғыштарды таңуға нұсқау бергені анықталды.
