Премьер-министрдің орынбасары Қанат Бозымбаев Ақтау түбіндегі ұшақ апатынан қайтыс болған қазақстандықтардың отбасына демеушілер тағы әлеуметтік көмек көрсететінін және желіде ұшақтың қара жәшігіне байланысты таралған ақпараттың шынайы жағдаймен айырмасы бар екенін айтты.
Кazinform агенттігінің хабарлауынша ол «әлдебіреудің интернетке әлдебір мәліметті жариялағаны ақиқат деген сөз емес. «Қара жәшіктегі» деректердің мазмұнынан үлкен айырмашылық бар,» — деген.
Еске салсақ, ресейлік телеграмм-арналардың бірінде Ақтауда түбінде құлаған ұшақтың «қара жәшігінен» алынды деген тақырыппен әлдебір мәлімет тараған болатын. Ол мәтінде әзербайжандық әуе компаниясына тиесілі ұшақтың экипажы Ресейлік диспетчерлер ұсынған әуежайды таңдамай, Ақтауға бет алғаны туралы айтылады. Ресей сыртқы істер министрі Сергей Лавров та сол нұсқаға іш тартатынын байқатқан.
Қазақстан көлік министрлігі бұл мәселеге байланысты ресми дереккөзі жоқ, ғаламторда жарияланған дерекке түсініктеме бермейтіндерін мәлім еткен болатын.
Бұған дейін хабарланғандай, Ақтау түбіндегі ұшақ апатының алдын ала себептері келесі аптада айтылатыны белгілі болды.
Бұдан алдын Ресей сыртқы істер министрі Сергей Лавров Қазақстанның Ақтау қаласында құлаған Әзербайжан әуе компаниясының ұшағындағы қара жәшіктердің мазмұны туралы пікір білдірген. Оның айтуынша, жәшіктердегі деректер көп қызықты ақпарат бергенімен, БАҚ-та тараған апатқа қатысты мәліметтерді растамаған. Бұл туралы ол өткен жылғы ресейлік дипломатияның жұмыс қорытындысы бойынша өткен баспасөз мәслихатында айтты. Ол «БАҚ-та тараған апатқа қатысты мәліметтер расталмады» дегенде БАҚ-та жарияланған шұрқ тесілген ұшақ қалдықтарын меңзеген. Сол кезде БАҚ-та аталмыш ұшақтың атып түсірілуі мүмкін екені туралы хабарланған.
