Еңбек және халықты әлеуметтік қорғау министрлігі Шығыс Қазақстандағы кеніште 4 адам қаза тапқан жазатайым оқиғаны тексеру үшін арнайы комиссия құрған. Бұл туралы министрлікке сілтеп Tengrinews хабарлады.
Мәліметке қарағанда, комиссияны Шығыс Қазақстан облысының бас мемлекеттік еңбек инспекторы Батырбек Қизатов басқарады, оның құрамына өнеркәсіптік қауіпсіздік комитеті мен денсаумин санитарлық-эпидемиологиялық бақылау комитетінің аумақтық департаменттерінің, жұмыс берушілер мен жұмыскерлердің өкілдері бар екені айтылады.
Апат 31 тамызда болған. Сағат 16.25-те Шығыс Қазақстан облысы Алтай кентінде, «Востокцветмет» компаниясына қарасты Ертіс кенішінің «Ертіс» шахтасында ауысым кезінде белгісіз затпен улану белгілері бар 4 жұмысшының денесі табылған.
Министрліктің мәліметінше, қаза болған екі кенші — «Востокцветмет» қызметкері, тағы екеуі — «Шахтстрой Инжиниринг» мердігер ұйымының қызметкері.
«Востокцветмет» компаниясының тағы бір жұмысшысы, ұңғымашы А. Қамбаров ауруханаға жатқызылған.
«Комиссия жазатайым оқиғаның себептерін анықтайды», — делінген хабарламада.
