Қазақстан президенті Қасым-Жомарт Тоқаев Иранның ұшқышсыз ұшу аппараттары Әзербайжанның Нахчыван қаласындағы әуежайды атқылауына байланысты ресми ұстанымын білдірді.
Тоқаев «бауырлас әрі стратегиялық одақтас» атаған Әзербайжан еліне қарсы жасалған бұл әрекетті қатаң айыптайтынын жеткізді. Сондайда Қазақстан тарапы аймақтағы тұрақтылық пен егемендік құндылықтарының сақталуын қолдайтыны айтылған.
Президент оқиғаның мән-жайын анықтауда халықаралық құқық нормаларын сақтау және тату көршілік қарым-қатынасты қалпына келтірудің маңыздылығын атап өтті.
5 наурызда Әзербайжанның Нахчыван қаласына Иран тарапынан бірнеше ұшқышсыз аппараттан әуе соққысы жасалған. Дрондардың бірі әуежай терминалына, екіншісі Шекерабад ауылындағы мектеп ғимаратының жанына түскен. Салдарынан әуелгі мәліметте екі адамның зардап шеккені айтылады.
Оқиғадан кейін Әзербайжан сыртқы істер министрлігі Иранның осы елдегі елшісін шақырып, оған наразылық нотасын тапсырды.
5 наурызда Еуропа Одағы мен Парсы шығанағы ынтымақтастығы кеңесіне мүше елдердің сыртқы істер министрлері шұғыл бас қосып, Иран соққыларын қатаң айыптап, Тегеранды шабуылдарды дереу тоқтатуға шақырды. Иран соққысын қатаң айыптаған Әзербайжан президенті Илхам Әлиев болса, оны «опасыздық және жиіркенішті әрекет» деп атады.
Израиль мен АҚШ 28 ақпанда Иранға шабуыл бастағаннан бері Тегеран Американың аймақтағы базаларын зымыранмен атқылай бастаған. Сондайда Иран басшылары бұл әрекеттің база орналасқан елдерге бағытталмағанын бірнеше мәрте еске салған.
