Президент әкімшілігі басшысының бірінші орынбасары болып тағайындалған Дархан Сатыбалдыны қаңтардың 8-інде президент Қасым-Жомарт Тоқаев қабылдады. Бұл туралы Ақорданың баспасөз қызметі хабарлады.
Президент кездесу барысында Дархан Сатыбалдының бұған дейін атқарған Түркістан облысындағы әкімдік қызметіне жоғары баға берді.
Қасым-Жомарт Тоқаев президент әкімшілігі басшысының бірінші орынбасары лауазымы басқару процесі мен аймақтар арасындағы ықпалдастықты жетілдіру, өзінің тапсырмалары мен шешімдерінің жергілікті жерде орындалу барысына бақылауды күшейту, сондай-ақ қабылданған шаралардың сапасын жақсартып, азаматтардың мемлекеттік институттарға сенімін нығайту мақсатында енгізіліп отырғанын атап өтті.
Дархан Сатыбалды бұл қызметке 6 қаңтада тағайындалған болатын.
Президент әкімшілігі басшысының орынбасары деген қызмет 2023 жылғы 1 қыркүйекте жойылған еді.
Сол кезде президент әкімшілігінің құрылымы өзгерген. Әкімшіліктегі төрт бөлім қысқарып, жаңа құрылымға президент әкімшілігінің басшысы, Қауіпсіздік кеңесінің хатшысы, президент кеңсесінің басшысы, президенттің көмекшілері мен кеңесшілері, президент әкімшілігінің бөлімдері қосылған.
Тоқаевтың жарлығына сәйкес, президент әкімшілігі басшысының орынбасарлары да қызметінен босатылған. Олардың бірқатары кейін президенттің көмекшісі, кеңесшісі болды.
Дархан Сатыбалдыға дейін жойылған қызметте Тимур Сүлейменов отырған еді. Өзгерістен соң ол Ұлттық банк төрағасы болып тағайындалған. Қазір президент әкімшілігін Айбек Дәдебай басқарады.
