Ақмола облысы Степногорск қаласындағы №4 түрмеде жеті жылдық жазасын өтеп жатқан белсенді, марафоншы Марат Жыланбаев 21 маусымнан бері аштық жариялап жатыр. Азаттықтың хабарлауынша, бұл туралы оның адвокаты мен түрме әкімшілігі хабардар еткен.
Түрме басшылығы Жыланбаевты «қауіпсіздігі үшін» 20 маусымда тәртіптік изоляторға ауыстырған. Ал белсенді 21 маусымнан бастап аштық жариялаған. Мұны Азаттыққа колония басшысы Қанат Тулақов айтты.
Жыланбаев бұған дейін адвокаты арқылы түрмедегі қоқан-лоқыға шағымданған. Белсенді «түрме қызметкерлері басқа сотталушыларды өзіне қарсы қойғанын» мәлімдеген. Түрменің жаңа басшысы Азаттыққа бұл жайтты ішінара растады. Тулақов кеше, 30 маусымда Жыланбаевтан «мекеме қызметкерлерімен жайтқа бола» денсаулығын құртпауды», аштықты тоқтатуды сұраған. Бұған қоса, Тулақов түрмеге жұмысқа жаңа келгенін, жағдаймен толық таныс емесін жеткізді.
Түрме башысы Жыланбаев өзі отырған камераның дымқыл екеніне шағымданып, басқа камераға ауыстыруды сұраған. Тулақов оған түрмедегі кейбір камералардағы жағдай «тіпті нашар екенін» айтқан.
Түрме әкімшілігі Жыланбаев барлық құжатын прокуратураға бергенін мәлімдеді. Тулақов Азаттықтың «Жыланбаевтың түрмеде өміріме қауіп төнді деген шағымына қатысты қызметтік тексеріс жүріп жатыр ма?» деген сауалына, «прокуратураға қайырылыңыздар» деп жауапсыз қалдырды.
Түрме басшылығы Марат Жыланбаевтың қазір тек су ішіп жатқанын, дәрігерлердің бақылауында екенін айтты.
Жыланбаевтың адвокаты Мейіржан Досқараев 26 маусымда Степногорскідегі №4 түрмеге барып, белсендімен кездескен. Қорғаушының сөзінше, басқа сотталушылар қоқан-лоқы жасаған соң белсендіні 20 маусымда «Қауіпсіз орын» бағдарламасына сай тәртіптік изоляторға ауыстырған. Жыланбаев бұл шешімге қарсы болып, 21 маусымда аштық жариялауды бастаған
Қорғаушының сөзінше, Жыланбаев аштық ұстамай тұрғанда 68,4 келі болса, 25 маусымдағы салмағы 65,3 келі болған. Жыланбаев «өзін қауіпсіз орынға ауыстырмайынша және санэпидстанция келмейінше аштықты тоқтатпайтынын» мәлімдеген.
