Жетісу облысының қылмыстық істер жөніндегі мамандандырылған ауданаралық сотында 16 жастағы Шерзат Полаттың өліміне байланысты сот отырысы жарыссөз кезеңіне жетті, ал прокурор айыпталушыларға қанша жыл жаза сұрайтынын жариялады.
Kazinform агенттігінің хабарлауы бойынша айыпталушылар 9 адам екені белгілі болған. Мемлекеттік айыптаушы Дана Сәрсенбай айыпталушы Абзал Шынасылға — 23 жыл, ал Равиль Сәкиевке 20 жыл жаза тағайындауды сұрады. Сотталушылар Дархан Әскентай, Нұрбол Тоқтаубаев, Шыңғыс Белғожаев, Дидар Қалиахметке — 7 жыл, Нұрқияс Ілиясовқа өтелмеген жазаны ішінара қосу арқылы түпкілікті — 9 жыл, Азамат Тоқтаубаевқа өтелмеген жазаны ішінара қосу арқылы түпкілікті — 15 жыл, Думан Ысқаққа 1 жыл 6 ай жаза сұрады.
Айыпталушыларға келесідей айып тағылған:
— Абзал Шынасыл Қылмыстық кодекстің 293-бабы 3-бөлігі (бұзақылық), 99-бап 2-бөлігі 5, 9, 14-тармақтары (адам өлтіру), 24-бап 3-бөлігі (қылмысқа дайындалу және қылмысқа оқталу), 99-бап 2-бөлігі 1, 7, 9 тармақтары.
— Равиль Сәкиев Қылмыстық кодекстің 293-бабы 3-бөлігі (бұзақылық), 24-бап 3-бөлігі (қылмысқа дайындалу және қылмысқа оқталу), 99-бап 2-бөлігі 1, 7, 9-тармақтары (адам өлтіру);
— Шыңғыс Белғожаев, Нұрқияс Ілиясов, Дархан Әскентай, Нұрбол Тоқтаубаев, Дидар Қалиахмет, Азамат Тоқтаубаев Қылмыстық кодекстің 293-бабы 3-бөлігі (бұзақылық).
— Азамат Тоқтаубаев Қылмыстық кодекстің 188-бабы 1 бөлігі (бөтеннің мүлкін жымқыру).
— Кәмелетке толмаған Дидар Ысқақ Қылмыстық кодекстің 434-бабы (қылмыс туралы хабарламау) бойынша айып тағылып отыр.
Былтыр 4 қазан күні төбелестен 16 жастағы жасөспірім Шерзат Полат қаза болған еді. Ал 12 қазанда қара жамылған отбасының үйі өртеніп кетті. Кейін желтоқсан айында Шерзаттың ағасының мәйіті табылған.
