Концертіне тоқтау салынған соң 31 мамыр күні композитор, әнші Еркеш Шәкеевтің отызыншы жылдарғы ақындардың өлеңдеріне жазылған әндер топтамасының онлайн нұсқасы ұсынылды.
31 мамыр – саяси қуғын-сүргін және ашаршылық құрбандарын еске алу күніне орай танымал композитор және орындаушы Еркеш Шәкеевтің «Алаш» атты музыкалық альбомы жарыққа шықты.
Альбомға Ахмет Байтұрсынұлы, Міржақып Дулатұлы, Ілияс Жансүгіров, Шәкәрім, Бейімбет Майлин, Сұлтанмахмұт, Мағжан Жұмабайұлы және Сәкен Сейфуллин сынды қазақ әдебиетінің ұлы тұлғаларының шығармаларына жазылған әндер қамтылған.
Альбом тұсаукесеріне режиссер Азиз Жамбакиев (Shivang) Міржақып Дулатұлының «Жұт» және «Елім-ай» әндеріне түсірілген бейнебаяндарын ұсынған. Бейнероликтер Орталық мемлекеттік кино-фотоқұжаттар және дыбыс жазбалар архивінен алынған бұрын-соңды жарияланбаған тарихи кадрлармен толықтырылған.
Альбом әйгілі лондондық Metropolis Studios студиясында жазылып, Алматыда Юрий Демченконың студиясында дыбысқа жазылды. Сапалы музыкалық өңдеуге Грэмми сыйлығының иегерлері Пол Норрис (сведение) пен Мэтт Колтон (мастеринг) атсалысқан. Жобаға көптеген отандық музыканттар мен орындаушылар қатысқан. Олардың қатарында Архат Қуанышалиев, Ілес Жалғасбек, Нұрай Айтуарова, Нұрболат Қыдырбаев және Steppe Sons тобы бар.
Альбом сатылымынан түскен барлық қаражат қуғын-сүргінге ұшыраған қазақ ақындарының мұрасын сақтап, дамытуға жұмсалатыны айтылады. Қолдау білдіргісі келетіндер үшін арнайы сілтеме де жарияланған.
Мамыр айының басында Еркеш Шәкеев Almaty Theatre сахнасында өтеді деп жоспарланған Саяси қуғын-сүргін мен Ашаршылық құрбандарын еске алуға арналған “Алаш” концертінің өтпей қалғанын, нақтырақ айтқанда, белгісіз себептермен билет сату тоқтатылғанын хабарлаған. Бұл концертті режиссер Ермек Тұрсынов жүргізбек болатын. Алайда концерт өтпейтіні хабарланған соң, іле-шала режиссер де елден кеткенін жариялаған.
