Әзербайжанның Төтенше жағдайлар министрлігі Ақтаудағы ұшақ апатынан тірі қалып, енді есін жинаған бортсерік Айдана Рахимлидің фото және видеосын жариялады. Бұл туралы Tengrinews хабарлады.
Маңғыстау облыстық ауруханасы палатасында жатқан ол Әзербайжаннан келген делегация мүшелерін көріп көзіне жас алған.
Айдана – Бакуден Грозныйға бағыт алған Azerbaijan Airlines әуекомпаниясының ұшағы апатынан аман қалған 28 адамның бірі. Стюардессадан басқа, экипаждың тағы бір мүшесі аман қалған. Ол — бортсерік Зұлпықар Асадов.
Еске салайық, 25 желтоқсанда жергілікті уақыт бойынша сағат 11:30-да Бакуден (Әзербайжан) Грозныйға (Ресей) ұшқан Azerbaijan Airlines ұшағы Ақтаудан үш шақырым жерде апатқа ұшырады. Жолаушылар ұшағы қалың тұман салдарынан Грозныйға қона алмай, әуелі Махачкалаға, кейін Ақтауға бағытталғаны айтылады.
Апат себебіне қатысты бірнеше нұсқа бар. Бір нұсқа бойынша, апатқа ұшақтың құстарға соқтығысуы себеп болған. Тағы бір БАҚ бортта оттегі багы жарылғанын хабарлады. Embraer Ақтау әуежайына 3 минуттан аз уақыт қалғанда рульді басқара алмай, апатқа ұшырады.
Төтенше жағдайлар министрлігі мәліметінше, бортта 69 адам, оның ішінде 5 экипаж мүшесі болған:
- 42 Әзербайжан азаматы;
- 16 Ресей азаматы;
- 6 Қазақстан азаматы;
- 3 Қырғызстан азаматы;
- Ұлты белгісіз екі әйел, біреуі шамамен 32 жаста, екіншісі шамамен 40 жаста.
Кейінгі мәліметтер бойынша, 29 адам тірі қалған. Олар Әзербайжан, Ресей және Қырғызстан азаматтары. Ал ұшақта болған Қазақстанның алты азаматының алтауы да қаза тапқан.
