5 маусымда Талдықорғанда 16 жастағы Шерзат Полаттың өліміне қатысты істе 9 айыпталушыға үкім оқылды. Ең жоғары жаза – прокурор сұраған 23 жыл өзгеріссіз қалды.
Азаттық радиосының хабарлауынша, сот «Адам өлтіру», «Адам өлтіруге оқталу», «Бұзақылық» баптары бойынша айыпталған Абзал Шынасылды 23 жыл түрмеге кесті.
Сот үкімі бойынша:
- Равиль Сакиев – 20 жыл;
- Азамат Тоқтаубаев – 15 жыл;
- Шыңғыс Белғожаев – 7 жыл;
- Дархан Әскентай – 7 жыл;
- Нұрқияс Ілиясов – 9 жыл;
- Дидар Қалиахмет – 7 жыл;
- Нұрбол Тоқтаубаев – 7 жыл;
Сот кәмелетке толмаған Д.Ысқақты бір жыл 6 ай түрмеге кесті.
Бұдан алдын мемлекеттік айыптаушы Дана Сәрсенбай айыпталушы Абзал Шынасылға — 23 жыл, ал Равиль Сәкиевке 20 жыл жаза тағайындауды сұрады. Сотталушылар Дархан Әскентай, Нұрбол Тоқтаубаев, Шыңғыс Белғожаев, Дидар Қалиахметке — 7 жыл, Нұрқияс Ілиясовқа өтелмеген жазаны ішінара қосу арқылы түпкілікті — 9 жыл, Азамат Тоқтаубаевқа өтелмеген жазаны ішінара қосу арқылы түпкілікті — 15 жыл, Думан Ысқаққа 1 жыл 6 ай жаза сұраған болатын
Сот жәбірленушілердің моральдық және материалдық өтемақы өндіріп беру туралы өтінішін ішінара қанағаттандырды.
Үкім бойынша Шынасыл Абзалдан жәбірленушілерге — 60 млн теңге, Сакиевтен 30 млн теңге өндіріледі. Бұған қоса, ортақ тәртіппен қалған сотталушылардан (Д.Ысқақтан басқасы) 30 млн теңге өндіріледі.
Сот қылмыстық іс бойынша куәгерлер Эльмира Нұрбекова мен Дана Жақсыкелді, Қазакенова, Рузбакиеваның әрекеттерін тексеріп, оларға құқықтық баға беру жөнінде де жеке қаулы шығарды.
Былтыр 4 қазан күні төбелестен 16 жастағы жасөспірім Шерзат Полат қаза болған еді. Ал 12 қазанда қара жамылған отбасының үйі өртеніп кетті. Кейін желтоқсан айында Шерзаттың ағасының мәйіті табылған. 5 маусым күнгі үкім тек Шерзат Полаттың өлімі туралы іске байланысты шықты.
