Президент кеңесшісі — баспасөз хатшысы Берік Уәли Киевте қастандыққа ұшыраған Айдос Садықовтың ісіне қатысты пікір білдірді. Бұл туралы Tengrinews агенттігі хабарлайды.
«Мемлекет басшысы бұл ресурсқа ешқашан қызығушылық танытып, қараған емес. Қазақстанда әртүрлі бағыттағы ондаған, тіпті жүздеген осыған ұқсас арналар мен сайттар жұмыс істейді. Олар жұмысын жалғастырып жатыр. Аталған ресурсқа келетін болсақ, ол ешқашан ішкі ақпараттың күн тәртібіне ерекше әсер еткен емес. Оның үстіне, көптеген адам оның бар екендігі туралы Киевтегі оқиғадан кейін ғана білді», — деді Берік Уәли нақты атаулардан қашқақтап.
Сондай-ақ, президенттің баспасөз хатшысы «Ел басшылығының стратегиялық бағытын, оның ішінде сыртқы саясат саласында Қазақстанның атына қысым жасауға тиімді пайдаланатын күштер бар» деп болжады.
Берік Уәлидің айтуынша, қылмыс Украина аумағында жасалғандықтан, тергеуді осы елдің құзырлы ведомстволары жүргізеді.
