Бизнеске қолдан заңсыз тосқауыл жасау – мемлекетке қарсы жасалған қылмыс. Бұл туралы Құрылтай отырысында «Жаңа тарихи кезеңдегі Қазақстанның өзекті міндеттері» атты жолдауында президент Қасым-Жомарт Тоқаев айтты.
28 қазанда президент Құрылтай мінберіндегі алғашқы жолдауында экономикалық баптар бойынша қылмыстық қудалауға тартылып жатқан кәсіпкерлерден өтініштер көптеп түсіп жатқанын айтқан. «Сондықтан экономикалық құқық бұзушылықтарды одан әрі қылмыссыздандыру бағытында шаралар қабылдау қажет. Кәсіпкерлерге, әсіресе, шағын және орта бизнеске тең мүмкіндік беріп, әділ бәсекеге жол ашу қажет. Кей жағдайда осы талап сақталмайды. Оған дәлел: қазірдің өзінде өндірушілер, әсіресе азық-түлік саласындағы кәсіпорындар бірқатар қиындыққа тап болуда. Тіпті, әдейі жасалған кедергілер де бар,» — дейді президент.
Айтуынша, импорттық тауарлардың құны қолдан төмендетіліп отыр. Ал отандық өнімдердің ішкі нарыққа шығу жолы әдейі шектеліп жатады.
«Шынын айтқанда, бұл – жемқорлық. Сондықтан осындай қитұрқы әрекеттерді тоқтату керек. Мұндай ахуал еліміздің компаниялары мен тауарларының бәсекеге қабілетін едәуір әлсіретіп жіберетіні сөзсіз. Осындай іс-қимылдарға қатаң тосқауыл қоймасақ, экономикамызға зиян болатыны айдан анық. Басқаша айтсақ, бизнесті қорғау – ұлттық экономиканың дербестігін нығайту деген сөз. Ал бизнеске қолдан заңсыз тосқауыл жасау, бұл – мемлекетке қарсы жасалған қылмыс деп айтсақ артық болмас. Сондықтан кәсіпкерлерді қолдау тетіктерін жетілдіру, яғни нығайту қажет. Бұл жұмысты сауда бірлестіктері аясында жүргізуге де болады,» — дейді президент Тоқаев.
Жолдауда шекарадағы көлік кептелістері де сыналды.
«Егер шекара бірнеше шақырымға созылатын көлік кептелістеріне себеп болатын «тар өткелге» айналса, ал дәл қазір жағдай осындай болса, Қазақстанның көшбасшылығы туралы сөз қозғаудың өзі мүмкін емес», — деген президент жолдауда.
Ел басшысы сынға алған мәселенің бірі – инвестиция тартудағы жүйесіздік.
«Бәсекеге қабілетті болу үшін жедел шешімдер қабылдап, жылдам әрекет ету қажет. Бірақ елімізде инвестор тарту және оларды жан-жақты қолдау жүйесінде бірізділік жоқ. Әрбір мекеме немесе жеке тұлға ойында не бар болса, соны істей береді. Нәтижесінде кешенді көзқарас та, үйлесімділік те, сабырлық та, білім де жетіспейді», — деген Қасым-Жомарт Тоқаев инвестиция тарту ісін бір орталықтан басқаруға мүмкіндік беретін тұтас жүйе қалыптастыру қажеттігін айтты.
«Менің ойымша, баяғыдан сөреде жатқан мәселені, яғни инвестициялармен жүйелі түрде айналысатын мекемені анықтау керек. Себебі қазіргі таңда осы бағытта жүйе жоқ. Бірқатар мемлекеттік мекемеге бірдей құзыреттер берілген. Қазіргі жағдайда бұл тәсілдер заман талабына сай келмейді, әбден ескірген. Бәлкім, инвестицияға қатысты мәселелермен «Бәйтерек» холдингі белсендірек айналысқаны дұрыс шешім болар. Ал экономика министрлігі, сыртқы істер министрлігі инвестицияларға байланысты кейбір құзыретін орындауды жалғастырады»,- деген президент өз жолдауында.
Бұл – президент Тоқаевтың Ақордаға келгеннен бері жасаған жетінші жолдауы. Бұрын парламент палаталарының біріккен отырыстарында оқылатын жолдау бұл жолы жаңа Конституция қабылданғаннан кейінгі бір палаталы Құрылтай мінберінде жарияланды. Жолдауда сыртқы саясаттың басым бағыттары айтылмады.
