Ұлттық қауіпсіздік комитетінің (ҰҚК) бұрынғы басшысы, бұрынғы премьер, экс-президентті «әке» атаған сенімді серігі болған, «Қаңтар оқиғасына» байланысты айыпталым, сотталған Кәрім Мәсімов Қазақстан президенті Қасым-Жомарт Тоқаевтан кешірім сұрады, деп хабарлайды Informburo.kz.
«Расында, ол осы мекемеден 2024 жылдың наурыз айында Қазақстан Республикасы Президентінің атына кешірім жасау туралы өтініш жолдаған», — деп хабарлады ҰҚК.
Мәсімовке қатысты қазір ҚР ҚК 218-бабының 3-бөлігінің 3-тармағы (Қылмыстық жолмен алынған ақшаны және өзге де мүлікті заңдастыру (жылыстату)) және 366-бабының 4-бөлігі (Аса ірі мөлшерде пара алу) бойынша сотқа дейінгі тергеу амалдары жүргізілуде.
Қазір ол Астанадағы ҰҚК-нің тергеу изоляторында отыр.
Мәсімов 2022 жылы Қаңтар оқиғасы кезінде қамауға алынған. Былтыр 24 сәуірде Астана қаласы қылмыстық істер жөніндегі ауданаралық соты Қазақстан ұлттық қауіпсіздік комитетінің бұрынғы басшысы Кәрім Мәсімовті «мемлекетке опасыздық жасады», «билікті басып алуға оқталды» және «қызмет өкілетін асыра пайдаланды» деп айыптап, 18 жылға қамауға үкім шығарды.
ҰҚК ақпаратынша, Мәсімовтің үстінен Қылмыстық кодекстің «Қылмыстық жолмен алынған ақша мен өзге де мүлікті заңдастыру» және «Аса ірі мөлшерде пара алу» баптары бойынша сотқа дейінгі тергеу жүріп жатыр.
Оның бұрынғы орынбасарлары Әнуар Садықұлов — 16, Дәулет Ерғожин — 15 және Марат Осипов үш жылға сотталды.
