31 мамыр Саяси қуғын-сүргін және Ашаршылық құрбандарын еске алу күнінде Еуропа Одағының Қазақстандағы елшісі Алешка Симкич пен ЕО-ға мүше өзге де мемлекеттердің елшілері Қарағанды облысының ресми тұлғаларымен бірге Спасск мемориалдық кешенінде гүл шоқтарын қою рәсіміне қатысты. Жиналғандар құрбандар рухына тағзым етті.
Рәсім барысында тоталитарлық режимдерден зардап шеккен және қаза тапқан жандардың, соның ішінде жазықсыз сотталып, хабар-ошарсыз кеткен, сондай-ақ Ашаршылық пен қуғын-сүргін салдарынан қаза тапқандар жайлы айтылды.
Спасск мемориалдық кешені – ХХ ғасырдағы саяси қуғын-сүргін құрбандарының тағдырын еске алатын, рухтарына тағзым ететін маңызды тарихи орындардың бірі. Бұл жерде әртүрлі ұлт өкілдері болған тұтқындар мен тоталитарлық жүйенің зардабын тартқан жандарға арналған ескерткіштер орналасқан.
Бұл жағдайда Қазақстанның жоғары басшылығы ешқандай рәсімге қатыспады. Еске алу рәсімдері тек аймақ басшылары деңгейінде өткізілді. Президент бұл атаулы күнге үндеу арнап, Қазақстанды жарқын болашақ күтіп тұрғаны жайында айтты. Шағын үндеуде Ашаршылық туралы мүлде аталмады.
