Президент Қасым-Жомарт Тоқаев Ақорда әкімшілігінің басшысы Айбек Дәдебайды қызметтен босатып, орнына премьердің бірінші орынбасары Роман Склярды тағайындау туралы жарлық шығарды. Бұл туралы 5 мамыр күні Ақорданың баспасөз хабарлады.
8 мамырда 55 жасқа толатын Роман Скляр еңбек жолын слесарь болып бастаған. Павлодар мен Астанада қалалық департамент басшысы, әкімнің орынбасары сияқты қызметтерді атқарған. Ол 2022 жылғы Қаңтар оқиғасынан кейін премьер-министрдің бірінші орынбасары, оған дейін премьер-министрдің орынбасары, индустрия және инфрақұрылымды дамыту министрі қызметтерін атқарған.
Ал 2024 жылғы 6 ақпаннан бері президент әкімшілігін басқарып келген Айбек Дәдебайға ендігіде «президенттің жеке тапсырмасы бойынша алда атқыралар үлкен саяси кампанияда қоғамдық-саяси бағыттағы жұмыстар» жүктелгені хабарланды. Бұл туралы Ақорданың баспасөз хатшысы Айбек Смадияров айтқан. 46 жастағы Айбек Дәдебай бұған дейін Тоқаевтың төңірегінде президенттің іс басқарушысы, президент кеңсесі бастығының орынбасары, парламент сенаты төрағасының хатшылығы меңгерушісі, Қазақстанның БҰҰ-дағы (Женева) тұрақты өкілдігінің үшінші хатшысы тәрізді лауазымды қызметтерді атқарған. Мемлекеттік марапаттарға ие.
