Президент Қасым-Жомарт Тоқаев Пәкістан премьер-министрі Шахбаз Шариф пен Пәкістан Қарулы күштерінің бас қолбасшысы, фельдмаршал Асим Мунирдің араағайындығы арқылы Таяу Шығыстағы соғысты толық тоқтату және бітімге келу туралы келісімге қол жеткізілуін құптайды.
Бұл туралы президент кеңесшісі – баспасөз хатшысы Айбек Смадияров Telegram-арнасында мәлімдеді. «Бұл келісім АҚШ Президенті Дональд Трамптың және Иранның жоғарғы басшылығының, сондай-ақ әскери қақтығысқа қатысқан елдердің ізгі ниеті мен парасаттылығының арқасында мүмкін болды. Мемлекет басшысы әлемдік сауданың дамуына және барлық мемлекеттің экономикалық өркендеуіне жағдай жасау мақсатында қол жеткізілген бітімгершілік келісімнің ұзақ мерзімді сипатқа ие болатынына үміт білдірді», — деп түсіндірді Смадияров.
Бұдан алдын АҚШ президенті Дональд Трамп 7 сәуірде «Truth Social желісінде «Бүгін түнде тұтас бір өркениет өледі және ешқашан қалпына келмейтіндей болады. Мен бұлай болғанын қаламаймын, бірақ солай болатын сияқты,» -деп Иранға қоқан-лоққы үйірген және келісімге келуге уақыт берген. Алайда сәуірдің 8-інде АҚШ президенті 2 аптаға соғыс қимылдары тоқтатылғанын, Пәкістанның араағайындығымен Иранмен келіссөз жүргізілетінін жазды. Келіссөз 10 сәуірде Исламабадта басталуы керек.
АҚШ пен Израиль 28 ақпаннан бері Иранды соққылап, Иран да олардың базаларын, ресурстарын атқылап келген.
