Асылхан Мамашұлының «Қилы кезең» деректі фильмінің соңғы, он екінші бөлімінде тәуелсіз Қазақстан тарихындағы небәрі екі жылдың ішінде екінші мәрте ауыстырылған Конституция қабылданар қарсаңдағы ахуал баяндалады.
Он үшінші сайланған Жоғарғы кеңестің төрағалығына талас, бұл парламент бір жылға жетпей неге тарады, президент сайлауына түсуге ынта білдірген алғашқы претентент кім, ассамблея құру идеясы қайдан шықты, Абай тойы неге биліктің құралына айналды, Назарбаев қандай «әділдікті» көкседі? Фильмде осы оқиғаның барысына шолу жасалады, сол кездегі парламент өкілдері, Назарбаевтың жақтаушылары мен сынаушыларының пікірі айтылады. Билікті бір өзінің уысына жинауға ұмтылған Назарбаевтың парламенттік дағдарысты бұл жолы қалай өз пайдасына жаратқаны талданады.
Мұның соңы 1995 жылы екінші Конституцияның қабылдауына бастап әкелді. Соңынан Негізгі заңға жалғыз адамның билігін нығайтып, билеп-төстеуін арттыру үшін үнемі өзгертулер енгізіліп отырды. Бастапқы қалпынан тайып, неше мәрте өзгертілген бұл Конституция ақырында Назарбаев аңсаған құзіретті әперген құралға айналды.
Видеоны мына сілтемеге өтіп көре аласыз.
Дінмұхаммед Қонаев кетер қарсаңындағы Қазақстан билігіне тартыс 1995 жылы жаңа Конституция қабылдап, Н.Назарбаев билікті түгел өзіне алғанға дейін жалғасты.
«Қилы кезең» тізбекті хабарында осы аралықтағы ірі саяси және қоғамдық оқиғалар қамтылған. Оқиға куәгерлері мен қолдағы деректер не дейді? Әр мәліметті дәлелмен баяндауға талпыныс жасалды.
