Конституция жобасын сынаған белсенділерді билік қысымға ала бастады. Полиция олардың бірін ұстап, бірінен әлеуметтік желіде сынап жазған пікірлерін өшіруді талап еткен.
Конституциядан орыс тілін алып тастауды талап еткен алматылық белсенді Дина Елгезектің үйіне полиция барып, «түсіндірме» жұмысын жүргізген. Бұл туралы Дина Елгезек өзінің Facebook-парақшасында хабарлады.
«Үйге полиция келді. «Түсіндірме жұмысы» дейді-мыс. Мен, Дина Елгезек, Қазақстан азаматы ретінде Конституцияны талқылауға толық қақым бар», — деп жазды қоғам белсендісі.
Дина Елгезек өз жазбасында Конституциядан орыс тілін алып тастауды талап еткен болатын.
«Конституциядағы «Мемлекеттік ұйымдарда және жергілікті өзін-өзі басқару органдарында орыс тілі ресми түрде қазақ тілімен тең қолданылады» деген 7 баптың 2-ші тармағын алып тастауды сұраймын!»,- деп жазған еді белсенді.
Бұған дейін Дина Елгезек әлеуметтік желідегі парақшаларында жаңа Конституция жобасын ашық сынап, бірнеше жазба жариялаған.
Алматы полициясы әзірге бұл жағдайға қатысты жауап қатпады.
Бұған қоса бүгін жаңа Конституция жобасына қатысты жиында сөйлеуі керек болған қоғам белсендісі Жарқын Күрентаевты да полиция ұстап әкеткен. Бұдан бөлек, Instagram-парақшасында Конституциядан орыс тілін алып тастау туралы жиі айтқан заңгер Нұрсұлтан Орынбековке де полиция ескерту жасаған.
Полиция мұнымен қоймай журналист Жалғас Ертайдан да әлеуметтік желідегі парақшасындағы Конституция туралы жазбасын өшіруді талап еткен. Бірақ журналист одан бас тартқан. Жалғас Ертай бұдан алдын Конституциядағы «орыс тілі ресми қазақ тілімен тең қолданылады» деген 2-тармақты өзгертуді ұсынған еді.
Ал премьер-министр Олжас Бектеновтің таяуда Конституция туралы «жалған ақпарат таратқандарға» қатаң шара қолдануды талап еткені белгілі.
